Inspeccion riba companianan cu a manda trahadonan cas: Flexibilidad riba ley laboral pa kita hende di trabou no ta posibel

Minister di Labor, Glenbert Croes a bisa cu den tempo di crisis di coronavirus/Covid-19 bo ta bay weita e miho cara of e pio cara di hende.

Tin compania cu no por cu nan peso laboral, pero tin otro companianan cu no kier. Den e caso aki e ta ripara cu abuso ta wordo cometi contra trahadonan neglishando nan derechonan bao e argumento di e crisis di Covid-19 cu nos ta pasando aden.

E mandatario su mensahe tabata cla. Pa esnan cu no por tene hende na trabou ta comprendibel cu nan mester atende e situacion aki den mutuo acuerdo cu nan trahadonan. Pero pa esnan cu no kier, e ta haya cu bo no por laga e tata y e mama di famia fin di luna sin cos di come.

P’esey nan a bin cu fondo di asistencia social di emergencia (FASE), unda nan ta defini e criterionan pa por cumpli cune. Ya caba nan tin alrededor di 8.400 peticion di trahadonan cu a perde nan entrada. Y tambe nan tin alrededor di 1.100 peticion di dunado di trabao.

Igualmente e mandatario a anuncia cu nan ta bay cuminsa severamente algun control riba e companianan of empresanan cu na dado momento ta mandando nan trahadonan cas. Of nan a reduci nan salario, ‘sin haci niun esfuerso real, sincero y genuino’ pa yega na un acuerdo cu nan. Pa asina percura cu e trahadonan por tin un entrada. E tin comprension cu esaki mester bay segun e dunado di trabou su forsa financiero.

Igualmente e mandatario a bisa cu mirando e cantidad di keho cu nan ta bin hayando, departamento di Labor ta cuminsa yama e companianan y tambe cuminsa manda inspectornan cerca nan.

Contesta na KvK.
Igualmente Croes a referi na e solicitud cu Camara di Comercio (KvK) a haci pa gobierno pa flexibilisa nos ley di labor, entre otro elimina articulo 1613 x lid 2 BWA. E articulo aki tin di haci cu contracto laboral pa tempo defini. E articulo aki tin cuater caso limitativo, y si nan ta wordo elimina, e trahado ta wordo condiciona na contracto di corto duracion di un par di luna so, y despues e relacion di trabou tambe ta termina.

Riba e solicitud aki di KvK, minister di Labor su contesta tabata: “Si comercio kier flexibilidad di ley laboral pa kita hende di trabou, mi contesta ta no. Si bo kier flexibilidad di ley laboral pa bo por yega na otro areglo cu e trahado den mutuo consulta pa loke ta trata salario, nivel di salario y orario di trabao, e contesta ta si.”