Aruba ta hopi adelanta riba e recomendacionnan pa reforma enseñansa. Minister di Enseñansa Endy Croes a bisa cu e 5 ehecutivonan di Inspeccion di Enseñansa di Hulanda cu tabata na Aruba siman pasa a bisa di ta satisfecho con e trabounan di reforma ta bayendo. Manera ta conoci, un di e elementonan di e landspakket pa Aruba ta reforma di enseñansa.

Inspector di Enseñansa di Hulanda, Erik Martijnse, hunto cu Inspectornan di Enseñansa Special y Enseñansa Avanza, Laurens de Croes y Susanne Rijken, tabata acompaña pa Director Financiero Marlot Zeldenrust y Investigado Arne Leer pa reunionnan cu tur esnan envolvi den e proceso di reforma.

Specificamente a papia di e recomendacionnan den e rapport intermedio cu a haci di enseñansa na Aruba. Tin un total di 13 recomendacion y e ehecutivonan Hulandes a bin Aruba pa mira con leu ta cu implementacion di esakinan.

Entre e recomendacionan ta un sistema di registracion, unda Gobierno lo yega na un banco di data di tur 86 scol, pero tambe maneho di idioma. “Aruba tin un comision cu desde Maart ta reuniendo riba e tema y pa December mester presenta su conclusion.”

E Inspectornan tin contacto directo cu tur profesional cu ta trahando riba e reforma di enseñansa y ta inclui e enseñansa pa adulto cu ta trahando riba dje hunto cu OAA, ademas pa yega na un sistema di financiamento robusto y transparente. Pa esaki a contrata register accountants pa yuda ehecuta diferente recomendacion.

Segun Minister, e 5 inspectornan a reuni cu n’e na fin di nan bishita na Aruba y nan a expresa di ta contento con e trabou riba e reforma ta bayendo. “Cu falta trabou pa haci, sigur. E recomendacionnan ta costa placa y energia. Tin di nan tin structuralmente gasto mara na nan. Y den algun area nos ta limita.” Aki ta papia specificamente di IB’ers, esta Interne Begeleiders pa scol kendenan ta brinda cuido necesario. Croes a ilustra cu tin un conflicto di un banda cu mester mas personal di cuido specifico na scol di un banda y e reduccion di gasto di personal den Gobierno di otro. Lo sigui reuni cu e inspectornan riba e tema aki y pa December lo mester tin un plan di parti di Aruba. Tambe lo hiba deliberacion cu COHO riba e plan cu e Inspectornan mes a yuda produci. Pero, e Minister a bisa pa no spera cu ta bay bira cambio mesora, pasobra un di e 13 recomendacionnan ta encera cambio di ley y/of traha ley, cu ta mishi tur tipo di enseñansa na Aruba. For di Maart a cuminza traha riba proceso di legislacion, cu mester produci leynan modernisa of simplemente leynan nobo denter di dos aña.