Inspeccion di Salud Aruba (IVA) y Ministerio di Salud Publico a tuma nota cu actualmente tin hopi oferta pa tratamentonan medico/estetico riba diferente pagina social manera entre otro ‘Vraag en Aanbod’ riba Facebook. Y ta adverti cu ‘lo no acepta practicanan medio ilegal’.
Esaki nan ta informa den un relato manda awe mainta.
Un poco dianan pasa a sali un aviso riba e Facebookpage unda ta ofrece servicionan di dentista. Despues e dentista conoci Hendrik Marsman a critica esaki y a urgi pa autoridadnan actua.
Inspeccion di salud ta informa:
“Segun ley na Aruba, solamente personanan cu diplomanan reconoci y registra na Departamento di Salud Publico Aruba (DESPA) por eherce nan trabou como medico. Pues, personanan cu ta duna cualkier tipo di tratamento medico sin autorisacion ta actuando contra ley y lo por wordo persigui door di Ministerio Publico.”
Segun inspeccion e ofertanan medico aki riba Facebook ta ‘alarmante’ pa motibo tambe di ‘e riesgonan grandi di salud ora ricibi tratamento medico for di personanan cu no tin e autorisacion di DESPA’.
Inspeccion ta urgi tur ciudadano pa informa bon prome cu dicidi di ricibi cualkier tratamento medico. “Si no ta sigur si un dunado di cuido ta registra, semper por tuma contacto cu DESPA na 5224200 pa puntra e informacion aki.”
