Den e prome siman di maart Inspectie Volksgezondheid Aruba (IVA) conhuntamente cu Inspectie Militaire Gezondheidszorg Hulanda (IMG) a bishita 5 practica dental na Aruba na unda nan a constata cu tin puntonan cu mester mehora.
Nan a señala cu nan no a anuncia e bishitanan di antemano y tabata un sorpresa pa e practicanan dental, nan tambe a reuni cu algun stakeholders importante den e sector durante e siman aki.
E meta di e proyecto tabata pa determina e prioridadnan den e sector dental segun e riesgonan mas halto, na e manera aki IVA por determina unda por aloca y concentra su esfuersonan mas eficiente cu ta posibel, esaki ta den e cuadro pa stimula mehoracion di e calidad di cuido den e sector dental pa e salud y siguridad di pashentnan.
Compara cu e nulmeting cu IVA haci na 2019-2020 (por haya e rapport aki pa lesa ariba nos website www.iva.aw) por a nota un mehoracion den e practicanan dental pero tambe a mira cu algun aspecto a keda igual cu locual IVA a constata na 2019-2020.
E bishitanan y combersacionnan a conduci na puntonan di mehoracion pa no solamente e practicanan dental individual pero tambe pa e sector dental en general, manera e necesidad pa stimula e uso di normanan y standardnan den e sector aki.
E practicanan dental cu a haya bishita lo ricibi un rapport di IVA cu lo consisti di puntonan di mehoracion. E puntonan di mehoracion na nivel nacional lo bay presenta na e sector dental pa asina conhuntamente tuma e pasonan necesario pa mitiga e riesgonan.
