Inspeccion di aviacion tin relacion estrecho cu aerolineanan

Aunke e inspectornan Hulandes no por a constata cu e departamento di aviacion di Aruba DCA, cu ta haci inspeccion riba avionnan, ta trahando insuficiente independiente di e industria, nan si ta conclui cu por papia di un relacion estrecho cu e companianan di aviacion cu nan mester inspecta.

Esaki por lesa den e rapport di Inspectie Leefomgeving en Transport (ILT) cu e staatssecretaris encarga a manda parlamento Hulandes (Tweede Kamer) riba e situacion na InselAir. Ayera nos a publica caba cu Hulanda lo interveni den e dos departamentonan di inspeccion di Aruba y Corsou pa motibo cu nan no ta traha manera mester ta. Siguramente e departamento di inspeccion di Corsou ta den un situacion hopi preocupante, segun e mandatario.

Aruba segun e, ta haciendo miho. Pero ora di analisa e conclusionnan den e rapport tin basta deficiencia den nos departamento tambe. Na Aruba tin mas ley compara cu na Corsou, cu ta regla e parti di inspeccion. Sinembargo e inspectornan ta traha cu un manual bieu cu no ta cumpli cu locual ta necesario den practica awendia. Segun e rapport e listanan di control y tambe e contenido di documentonan no ta cuadra mas.

Pa e inspeccion riba InselAir Aruba na 2016 y 2017, DCA tampoco a haci tur inspeccion planea na 2016 pa diferente motibo. Y niun biaha inspeccionnan den cockpit durante vuelonan cu pasahero a tuma luga. E inspectornan Hulandes tambe a constata cu DCA ta haci inspeccionnan diariamente, pero no riba nivel di sistema. Por ehempel e departamento tin acceso na sistemanan electronico di InselAir. Asina nan por haya un bista riba e estado di e avionnan y tambe planificacion di vuelonan. E departamento a indica cu nan ta controla e sistemanan aki regularmente, pero e resultadonan di esaki no ta warda un caminda specifico. Y e acceso na e sistemanan ta sosode a base di boluntad di e aerolineanan. Asina e ta depende di e (bon) relacion cu DCA mester mantene cu e companianan di aviacion.

Pa e punto aki por mira den un otro alinea den e rapport cu e departamento di inspeccion tambe ta tene cuenta cu e interes di Aruba den su decisionnan riba siguridad di aviacion. Como cu e conexionnan aereo ta hopi importante pa nos turismo y nos pueblo y e decisionnan di DCA por tin impacto negativo riba esakinan. Manera menciona e inspectornan Hulandes no por conclui cu e departamento no ta traha suficiente independiente. Pero nan a constata si cu e departamento ta tene cuenta cu e interes di Aruba y DCA tin un relacion estrecho cu e industria cu nan mester inspecta.