Inspeccion debido y multa ta necesario pa atende cu abuso na pia di trabou

Presidente di sindicato FTA, sr. Hubert Dirksz a vocifera su preocupacion riba desaroyo di sindicalismo caminda e ta haya cu e forsa di e trahado mester wordo fortifica mas. Dia 1 di Mei a wordo conmemora mundialmente Dia di Labor, y e sindicalista a trece su preocupacion cerca na Bon Dia Aruba den cuadro di FTA su prome congreso extraordinario di 2016.

“E trahado mester wordo conscientisa y e pueblo mester wordo mas conscientisa tambe, y mes trata mas ariba e derechonan di e trahadonan y e ciudadanonan”, asina e sindicalista a declara na Bon Dia Aruba.  Como presidente di FTA, nan ta kere cu riba e parti laboral mester bin un balansa. E ta haya cu e balansa aki mester bin  entre otro riba asunto di violacionnan di leynan na pia di trabou cu ta rekeri coreccion.

Inspeccion laboral y multa

Pa coregi e tipo di abuso laboral aki cu –segun sindicalista Dirksz- ta tumando na pia di trabou,  FTA ta rekeri un inspeccion debido di parti di e instancianan competente. E inspeccion aki mester ta uno conhunto entre otro dor di  departamento di Labor, Dimas, Warda Nos Costa, DTI, Brandweer, departamento di Salud Publico, departamento di Higiena, SVb , etc…

“Nos ta kere cu mester bin inspeccion mas severo y aplica multanan”, el a bisa. E combinacion aki tanto di inspeccion y multa lo contribui pa e dunado di trabou ta cumpli y nan ta paga loke nan mester paga. Ademas nan  mester trata e trahadonan manera mester ta y asina crea competencia husto, segun sr. Dirksz di FTA.  

“Esey nos ta kere cu mester pasa. Tin hopi situacion cu mester wordo atendi y lamentablemente nos gobierno y nos politiconan no tin atencion pa e cosnan aki ta parce…”, segun presidente di FTA.

E ta bisa cu FTA tin situacion particular manera esun di e trahadonan di Aura Casino. Aunke nan ta considera cu gobierno a duna atencion na esey, sinembargo el a tuma hopi tempo “mas cu loke nos a spera”.  Pero sindicalista Dirksz a laga sa cu por lo general tin hopi situacion cu ta merece atencion y FTA ta kere cu a yega e momento cu “seriedad mester prevalece ariba tur loke ta pasando na Aruba”.

El a agrega cu e asunto aki ta demanda atencion, ya cu na final nos tur ta keda biba akinan y e situacion no mester empeora ya cu manera e ta bayendo tin hopi indicacion incorecto den tur area. Specialmente loke tin di haber cu area di trabou, FTA ta demanda e atencion di gobierno y di tur otro instancia, ya cu e ta necesario.