Luna pasa secretario di estado Hulandes Sharon Dijksma a bisa cu Hulanda lo interveni den e departamentonan di inspeccion di aviacion na Aruba y Corsou. Nan lo manda inspectornan di nan mesun departamento di inspeccion pa yuda drecha e situacion. Pero awor ta mustra cu nan inspeccion mes no ta funcionando bon.
E noticia aki a sali diasabra den prensa Hulandes. ‘Vlieginspectie lachwekend incompetent’ asina De Telegraaf ta publica. Nan ta papia di e inspeccion ILT cu pa motibo cu nan a corta riba e departamento aki, y tambe falta di conocemento y mucho reglanan burocratico, no ta funcionando. Nan ta haci eror na aeropuerto di Schiphol y tambe esunnan regional.
E supervision ta asina malo cu hasta e siguridad den aviacion ta na peliger, asina aerolineanan y otro organisacionnan ta bisa. E presidente di Koninklijke Nederlandse Vereniging voor Luchtvaart (KNVVL) tambe a bati alarma. E ta bisa cu e relacion cu e inspeccion y aerolineanan ta riba nivel asina abou cu siguridad ta sufriendo. Segun e fuente Hulandes e director nobo di e inspeccion Hulandes, esta Jacqueline Lamé, ta admiti cu hopi cos ta bay robes. Un compania externo a haci un analisis y awor lo bay reorganisa e departamento.
Na Aruba e departamento tampoco ta funcionando manera mester. Asina ILT a conclui a base di e situacion cu InselAir a trece. Sinembargo Aruba ta haci miho cu e departamento na Corsou. No ta conoci si e problemanan awor den ILT ta stroba e proceso cu Hulanda a palabra cu e islanan pa yuda drecha nan departamentonan di inspeccion di aviacion.
