Diasabra atardi, minister Marisol Lopez-Tromp a biaha bek pa Hulanda. Despues cu el a permanece dos dia na Aruba, unda diabierna a confronta un reunion den Parlamento, pidi pa fraccion di POR pa entrega un mocion di censura contra dje, loke na final no a sucede.

Sinembargo algun ora prome cu el a biaha, e mandatario por a scucha parti di e conferencia di prensa di e lider di POR, minister Andin Bikker, kende tambe a haci algun insinuacion riba caso di conflicto di interes den direccion di minister Lopez-Tromp.

Prome cu minister Lopez-Tromp a aborda e coloso di KLM pa bay Hulanda pa atende su compromiso familiar cu su yiu, el a expresa cu e ta contento cu tur parlamentario por a haci nan preguntanan y cu e por a contesta nan. E no ta descarta cu durante su estadia na Hulanda, e lo bishita algun instancia na Den Haag.

Encuanto si e reunion aki el a consider’e fructifero, e mandatario ta haya cu pa loke ta informacion, ta keda e parlamentarionan mes pa husga. “Mi mes personalmente lo desea si pa e reunion yega na un votacion,” el a bisa. Pasobra e ta kere cu pa yega un situacion caminda el a wordo presenta como minister pa atende cu un mocion di desconfiansa, unda finalmente e reunion no a caba, como minister personalmente el a prefera pa por hiba e segundo tanda. Pa asina e lo por sigui informa riba cualkier inkietud of pregunta for di parlamentarionan.

E ora ey pa nan mes por a dicidi pa caba e reunion. Den e caso specifico aki, sea pa no vota pa baha su persona como minister of net lo contrario. Pero den todo caso e mandatario ta haya cu mester tin un claridad, ya cu ta keda den man di Parlamento e tarea di pone of kita.

Conflicto di interes

Pa loke minister Bikker a trece dilanti cu minister Lopez-Tromp su casa ta ofrece su servicio na Serlimar pa medio di su compania di accounting, e mandatario en cuestion a bisa cu esaki no ta e caso.

El a argumenta cu tur minister, y den su caso cu a pasa un screening pisa, ta normal cu nan mester kita tur cos cu por ta un conflicto di interes. Pero no solamente ora di screening, sino ora cu nan ta eherce nan funcion di minister, tampoco mester tin conflicto di interes.

El a declara cu den su caso esaki a sucede tambe, caminda si tabatin relacion di trabao, personalmente cu accounting relaciona cu algo cu tin di haci cu nan ministerio, esey mester wordo para. “Y esey a sucede tambe. Esey ta parti di screening cu bo ta pasa aden,” el a bisa. Minister Lopez-Tromp a laga sa cu loke minister Bikker a trece dilanti riba e punto aki, no ta corecto.

Un parti cu Sra. Lopez-Tromp por scucha for di minister di Husticia, Sr. Bikker, cu mas tanto e ta considera un conferencia di POR, cu tin cierto puntonan cu e no ta sinti confortabel. Sra. Lopez-Tromp no por a spera un conferencia di minister Bikker, despues cu a wordo bisa cu lo hiba un combersacion cu prome minister.

Mirando cu el a bay Hulanda bek y un proceso di dialogo y mediacion lo tuma luga pa atende e crisis aki cu a start den seno di POR, pero cu tin su impacto riba stabilidad di gobernacion actual, minister Lopez-Tromp no ta descarta cu e proceso aki lo tuma via telefon of cualkier plataforma virtual. Pero tambe e lo por ta personalmente, despues cu e lo bin Aruba bek.

Reunion

Igualmente el a referi na e reunion di Parlamento di diabierna ultimo. Minister Lopez-Tromp a bisa cu e tabata dispuesto pa bay un segundo tanda pa sigui informa pueblo di diferente asunto cu e ta considera importante pa Parlamento sa.

Pero a dicidi di pospone e reunion, y nan a propone pa minister presidente lo cuminsa un dialogo cu su persona. Tanten prome minister, Evelyn Wever-Croes, lo keda encarga di su cartera di Desaroyo Teritorial, Infrastructura y Medio Ambiente.

Pa loke ta e denuncia cu el a haci den Parlamento, minister Lopez-Tromp a bisa cu nan ta cosnan funda. El a reafirma cu nan ta puntonan cu asina nan ta, y e tin tur e documentonan pa mustra nan. Nan ta documentonan cu e ta dispuesto, si ta necesario, pa comparti cu pueblo tambe.

Riba e mandatario su conclusion riba e reunion cu el a sostene den Parlamento, minister Lopez-Tromp a laga sa cu el a wak henter e situacion cu a wordo crea, caminda el a sinti cu nan kier bah’e como minister. Mirando e cartanan cu a bin aden, y e tambe notula di e mediacion, pero e mes a pidi pa bay Parlamento. El a dicidi esey, mirando cu muy particularmente di parti di POR a bisa cu ‘nan no kier drecha relacion mas’.

E ta considera cu e tabata un momento importante pa pueblo por scucha kico ta kico, pero for di su persona. Pero no solamente cu Parlamento por haya informacion dor di otro via nan so.