InselAir kier kita 250 trahado y tambe kier cera e compania na Aruba. Ayera e aerolinea a scapa un otro caso unda a pidi pa bancarota di e compania InselAir International na Corsou. Pero mescos cu na Aruba, hues a dicidi di duna nan mas tempo pa regla nan finanza.
E mesun compania cu a pidi pa bancarota di InselAir Aruba, esta Jet Power Aruba Aircraft and Transit Company, a entama un caso na Corsou contra InselAir International. Conhuntamente cu Goddard Catering Group Curaçao. Sinembargo hues a dicidi ayera cu a base di articulo 209 inicio 6 di e Faillissementsbesluit lo duna e aerolinea mas tempo pa cumpli cu su obligacionnan financiero.
Mescos cu hues a dicidi na Aruba, nan a nombra un ‘bewindvoerder’, e abogado Van der Heuvel cu lo supervisa e proceso financiero na Corsou. Hues a dicidi tambe cu e periodo di suspension di pago ta caba dia 9 di juni. Riba e fecha aki lo dicidi si e suspension lo bira uno definitivo of lo tuma un otro decision. E compania a tene un conferencia di prensa na Corsou unda nan a anuncia tambe cu lo kita 250 trahado, mayoria na e departamento di mantencion. E departamento aki ta bou critica pa hopi luna como cu aki autoridadnan Arubano a constata fayonan grandi cu tabatin nan influencia riba e siguridad di e avionnan di Insel.
Banda di esaki tin e rumor cu InselAir kier cera e compania na Aruba como cu practicamente henter e flota ta suspendi di bula pa mas cu dos luna awor y asina ta perdiendo miyones. Gran parti di e 93 trahadonan di InselAir Aruba ta den accion pasobra nan no a cobra nan salario ainda. Pero den e caso den corte ayera na Corsou a bira cla cu no ta trata mas di un rumor cu kier cera e oficina na Aruba. E ta forma parti di e plan di rescate di InselAir.
