E compania di avion InselAir cu ta den problema financiero, a ricibi placa for di gobierno di Corsou. Al cambio gobierno lo eherce parcialmente control riba e maneho di e aerolinea.
Diasabra Amigoe a trece cu e compania ainda no a yega un acuerdo cu gobierno riba e parti di control. Pero otro fuentenan si a publica cu e partidonan a yega un acuerdo y ya e compania a ricibi placa for di gobierno pa asina continua cu su operacion di vuelonan. Locual ta crucial pa e ruta Aruba – Corsou – St. Maarten como cu awor no tin un otro opcion. Esaki pa basta tempo ta causa prijsnan halto riba e ruta, di casi 500 florin pa ticket. Banda di esaki e servicio di e aerolinea ta abou, unda gobierno di Aruba ya a indica den entrevistanan cu Bon Dia Aruba, cu pa falta di competencia nan no por haci mucho pa resolve e situacion aki.
E compania tin problema financiero grandi desde cu nan no por a haya nan placa for di Venezuela pa falta di divisa den e pais Latino Americano aki. Ya caba e compania na Corsou a haya in inyeccion financiero for di gobierno. Sinembargo esaki ainda no tabata resulta suficiente y e compania a pidi ayudo atrobe. E biaha aki gobierno a institui un comision cu expertonan bou ex premier di Corsou Etienne Ys cu a bin cu un plan.
E suma envolvi ta mas o menos 35 miyon florin cu ta encera un inyeccion financiero di 15 miyon florin. E otro parti ta unda e compania a pidi gobierno pa un areglo di pago impuesto y prima, mas tanto pospone esaki te ora nan tin e cash flow na ordo. Na Aruba un grupo di compania a bay corte recientemente pa bringa Insel como cu e compania tabata keda sin paga pensioen tambe. Pero hues a nenga nan peticion ‘den interes general’ pa asina evita cu e compania ta bay bancarota, lagando un gran cantidad di hende sin trabou na Aruba y Corsou, y e islanan sin conexion aereo.
Control den compania
Awor cu e compania a yega un areglo cu gobierno di Corsou, el a perde parcialmente su independencia. Den sentido cu dos miembro di gobierno ta drenta e hunta di comisario y asina tambe por vota pa e presidente nobo di e hunta. E hunta nobo e ora lo nombra e directornan nobo cu lo mester drecha e situacion financiero di e compania. Un punto cardinal ta cu Insel lo busca un partner strategico den e siguiente 6 luna pa asina sigui fortalece e compania su futuro. Banda di esaki Insel su directiva nobo mester traha riba un plan di stabilisacion.
