Den un conferencia di prensa ayera na Corsou InselAir a anuncia cu nan lo kita trahadonan. Cuanto exacto nan no a divulga. Tambe e aerolinea a bisa cu nan a perde 12 miyon dollar den e prome kwartaal di e aña aki.

E compania ta keda insisti cu nan a bay den un situacion financiero malo momento cu Venezuela a dicidi di no paga nan mas. Esaki a sosode na 2015. Preguntanan critico a bin despues riba e aerolinea, cuestionando InselAir riba e echo cu nan sigui bula riba destinacionnan Venezolano.

Sinembargo fundado Edward Heerenveen a bisa cu nan tabatin un acuerdo cu e autoridadnan Venezolano prome unda nan a cumpli cu nan promesanan di pago. Sinembargo na 2015 den un par di lunanan e situacion a deteriora y den e tempo cortico aki InselAir a perde miyones cu nan mester a saca for di e ganashi di vuelonan riba otro destinacionnan. “Esaki a bin inespera. Bo mester sa cu nos tabata e unico aerolinea e aña ey cu Venezuela a keda paga.” Pa motibo cu e placa a keda pega, e compania no por a keda inverti den e operacionnan manera mester ta asina, sr. Heerenveen a indica. Sinembargo e autoridad na Aruba cu ta haci control riba e siguridad di avionnan civil, esta DCA, a conclui cu e aerolinea no tabata mantene nan avionnan bon. Y cu e departamento di mantencion na Corsou no tabata cumpliendo. Fin di januari, despues di diferente incidentenan cu avion, entre otro ora e presion di aire a baha den e cabina, e autoridad aki a dicidi di ground e flota di InselAir na Aruba.

Esaki a causa cu e situacion financiero di e compania a deteriora hasta mas. Siman pasa departamento di impuesto di Aruba a dicidi di forsa un findishi di e inventario (menos e avionnan) di e oficina di InselAir Aruba. Pero na ultimo e compania a logra di para esaki. Ayera e director encarga cu financia a divulga cu pa motibo cu e flota a para na Aruba, nan a perde 12 miyon dollar na e prome kwartaal. Pero e director nobo di e compania, Gilles Filiatreault (riba potret), tambe a indica ayera cu a e sosten financiero di gobierno di Corsou di 33 miyon florin, y mehoracion di e operacion di nan vuelonan, nan ta pensa cu na mei/juni e situacion lo cuminsa drecha. Y cu nan ta riba un ganashi di 1 miyon dollar pa luna.

E motibo pa kita trahadonan, e ta sigui splica ta pa sigui baha e gastonan di e compania. Cuanto hende nan lo kita, e director a indica cu e no por bisa awor.