Corte a duna InselAir Aruba tempo pa cumpli cu su debenan. Asina e no ta posibel pa esunnan cu tin debe cerca e aerolinea pida pa e compania di aviacion bay bancarota sea pone beslag riba nan cuentanan.
Esaki ta e resultado di e caso den corte ayera mainta unda pidi pa InselAir Aruba bay bancarota. Sinembargo hues a dicidi di nombra un ‘bewindvoerder’, esta abogado Jeannot de Cuba. E tin e autoridad awor pa controla y aproba decisionnan manera acuerdo y contractonan, pero gerencia di e aerolinea por continua cu e operacion. E areglo aki yama ‘voorlopige surseance van betaling’ pues cu nan a suspendi pagonan, ta conta te 7 di juni.
InselAir Aruba a reacciona positivo riba e decision di hues. Nan ta informa cu ayera a reuni cu ‘empleadonan di e aerolinea na unda a duna e bon noticia di e veredicto y continuacion di e plan di rescate, cu ya ta riba bon caminda’. “E crisis financiero, cu wordo causa door di e claim pendiente na Venezuela, ta uno cu positivamente nos lo recupera di dje. Pero pa logra esaki InselAir Aruba lo mester di tempo pa reactiva su flota y operacion pa asina sigui sanea e retonan financiero. Nos tin hopi confiansa cu pronto tur esaki lo ta tras di lomba”, Stephan van Spaandonk, Chief Executive Officer di e aerolinea ta expresa den un relato cu e compania a manda pa prensa.
Segun e compania ‘e prome avionnan di flota pronto lo wordo permiti pa tuma vuelo atrobe, garantisando cumplimento cu regulacionnan/leynan di aviacion’. Bon Dia Aruba no a logra di haya un confirmacion di esaki na Departamento di Aviacion Civil di Aruba cu a ground e flota na januari.
