Hues a declara InselAir aruba bancarota ayera. Gerencia di e aerolinea a bin cu un plan pa salba e compania pero hues a sigui e recomendacion di e bewindvoerder.
E bewindvoerder aki, abogado Jeannot de Cuba ta confirma na Bon Dia Aruba cu ayera den un tratamento cortico den corte, hues a acorda su peticion pa converti e ‘surseance betaling’ (suspencion di pago) den un ‘faillissement’ (bancarota). E decision a bin a base cu no tin un perspectiva cu e reorganisacion di e compania lo ta exitoso, segun sr. de Cuba ta bisa nos. P’esey hues a mira e motibo pa manda e compania InselAir Aruba bancarota anto likida e bienesnan cu tin.
Ta trata aki di debe cu e compania tin cu tanto creditornan local como internacional, y cu ta varia di companianan di huur auto pa seguro y hopi mas.
Banda di esaki sr. de Cuba a remarca cu e compania tin un claim grandi riba estado Venezolano. Ta papia aki di un suma riba $30 miyon cu no sa cu si e lo wordo paga y cual no ta un claim cu a cuminsa awe, sino mas bien tin añanan caba caminda cu gerencia a scoge pa sigui bula pa Venezuela, consciente cu tabatin problema pa converti Bolivar pa Dollar.
Na opinion di sr. de Cuba e problemanan a bin ta creciendo di basta tempo caba, pero na momento cu Departamento di Aviacion Civil na Aruba a ground e flota di avion, esaki a resulta di ta e ‘nekslag’ pa e compania.
Bon Dia Aruba a purba tuma contacto cu Stephan van Spaandonk di InselAir Aruba pa un comentario pero no a logra haya esaki ainda ni for di empleadonan. E compania na Aruba tin mas cu 90 empleado y InselAruba ainda debe nan placa. Segun sr. de Cuba lastimamente mester duna tur retiro, como cu no tin forma pa cumpli cu contract di trabou.
InselAir International na Corsou a informa e siman aki cu e situacion na Insel Aruba no tin consecuencia pa nan si wordo declara bancarota.
InselAir Aruba ta e di dos compania di avion na Aruba e aña aki cu a bay bancarota. Tiaria Air, despues di un lucha mas largo den corte, finalmente tambe mester a para su operacion. E situacion na Venezuela tambe a hinca e compania aki den problemanan financiero.
