Instituto Biba Saludabel y Activo (IBISA) durante rueda di prensa ayera mainta a anuncia e prome careda pa aña 2022, Betico Croes Memorial Run. William Erasmus, hefe suplemente di e departamento di deporte y Glen Lacle, coordinador deportivo a duna informacion amplio di e careda cu lo tuma luga ariba Dia di Betico, 25 di januari.

E aña aki Betico Croes Memorial Run ta celebra su di 26 edicion e aña aki y lo tuma sali for di Centro Deportivo Betico Croes manera tur aña.

IBISA ta siguiendo e protocolnan di DVG pa mantene e seguridad di e participantenan y tambe e comunidad di Aruba. Sr. Erasmus a enfatisa cu ta hopi importante pa tur hende tene cuenta cu nan ta bay organisa e cardea y lo haci esaki den estilo di ola, “kiermen tur hende tin oportunidad pa participa na un actividad deportivo pa asina nos mantene e parti di salud mental y salud fisico tambe”, el a bisa.

El a remarca tambe cu IBISA ta reserva e derecho cu si mester bin cambionan den e maneho di protocol nan lo por trese cambio na e careda tambe. Por ehempel si nan bisa cu mester tin menos participante, nan lo mester adapta e cantidad di participantenan. Si ta necesario nan lo parti e olanan cu nan ta bay tin bay tin pa e careda den mas diferente orario pa asina minimalisa e cantidad di persona cu ta participa na mesun momento of si como ultimo medida mester pospone e careda y pone pa otro fecha, nan lo tene cuenta cu esey tambe.

Pero el a señala cu te na e momentonan aki tur cos ta bon y DVG tin preferencia pa deporte por sigui. “Kiermen ban purba mantene y ban haci e miho di esaki”, el a bisa.

Registracion pa e careda a cuminsa ayera 7 di janurai y por registra via e pagina di Facebook di IBISA. Lo tin un limite di 500 participante, normalmente tin hopi mas pero door di e pandemia IBISA ta mantene e limite di 500 participante pa asina nan por sigui cu e edicion number 26 di e careda.

Erasmus a splice cu e e careda tin dos categoria, dos distancia, categoria di 6 km y 10 km y e careda ta habri pa personanan di 17 aña bay ariba. E costo di participacion lo ta 25 florin pa participantenan local y 20 dollar pa participantenan internacional. Pago ta tuma luga na oficina di IBISA Oranjestad ariba dianan 18, 19, 20 y 21 di januari. E inscripción ta inlcui un bip, chip y t-shirt pa e careda.

“E parto di registracion ta importante y no ta paso bo a registra bo luga ta sigura. E registracion via Facebook ta haci e proceso mas fasil y asina bo no mester pra den rij ora bo bin paga”, el a enfatisa.

E careda ta cuminsa 6or di mainta y e prome grupo, e prome ola, cu ta sali ta e categoria di distancia di 10 km, y Erasmus a menciona tambe cu pa tur corredor interesa, aworaki e careda ta calibra oficialmente. Despues cu e prome grupo sali lo tin 10 minuut di break y e siguiente ola ta sali pa 6or y 10 minuut y despues e otro olanan ta sali cada cinco minuut.

“Nos ta bay purba haci esaki den cinco ola pa caba trempan y toch tin cuenta cu e distanciamiento di e cantidad di personanan cu ta participa”, Erasmus a agrega.

Sr. Lacle a splice cu den cada categoria lo tin premiacion pa e top tres participantenan femenino y masculino, y lo tin tambe premiación pa e top tres coredo femenino y masculino den cada categoria pa e siguiente categoria di edad 17 pa 19 aña, 20 pa 29 aña y 30 pa 34 aña. Pa motibo di situacion cu e pandemia e premiacion lo tuma luga ariba dia 27 di januari.