Ayera mainta durante conferencia di prensa, Jessica Ras, coordinador di Formacion Social (Sociaal Vormings Traject, SVT) a anuncia cu inscripcion ta habri pa e segundo trayecto di SVT damas. Demas personal cu ta forma parti di e trayecto di Formacion Social a brinda informacion ariba kico e trayecto ta encera y kico e participantenan lo por spera.

Ras a splica cu Formacion Social ta tumando aworaki inscripcion pa grupo dos di Formacion Social SVT damas. “Pa tur e damanan cu ta eyfo cu no ta haciendo nada, cu kier un segundo oportunidad, cu no ta trahando, nos a bin informa kico nos trayecto ta di Formacion Social y tambe con por aplica pa e trayecto,” Ras bisa.

Lieutant Vrolijk di Arumil, troop commander di Formacion Social, tabata encarga cu e fase uno di e ultimo dos trayecto di Formacion Social. El a splica cu SVT ta consisti di dos fase. E prome fase ta e fase militar unda ta forma e hobennan, y e di dos fase ta curso y stage.

Arumil ta responsable pa e prome fase. Lieutant Vrolijk a sigui splica cu e prome fase ta consisti di mas o menos 16 siman, esaki por varia entre un siman pa dos. E prome tres simannan e hobennan ta keda den Mariniers Kazerne y nan no mag di bay cas. Durante e prome tres siman nan tin nan prome mondi y despues nan por cuminsa bay cas pa prome biaha, den weekend.

Despues di esaki e hobennan ta bay Mariniers Kazerne di dialuna pa diabierna y nan ta haya e oportunidad pa bay cas durante weekend tambe y esaki ta keda asina pa e resto di e opleiding.

Lieutant Vrolijk a remarca cu tin un momento di e curso unda cu e hobennan ta haya e oportunidad pa demostra e habilidadnan cu nan a siña durante e fase militar y wak si nan por tuma e responsabilidad di asisti na Mariniers Kazerne di 7or pa 3or tur dia y asina biba un bida normal.

El a indica cu durante e prome fase nan ta siña diferente habilidad cu nan ta usa y cu ta yuda nan durante e di dos fase di e trayecto. E prome fase ta basa riba doctrina militar cu ta consisti di respet, comunicacion, traha den ekipo, entre otro. Na mesun momento el enfatisa cu e fase aki tin di haber cu tur loke ta militar, menos e uso di arma.

Corporal Leito a duna splicacion di e loke e damanan por spera, por experiencia, durante e prome fase di e trayecto di SVT. El splica cu e trayecto ta consisti di un ‘opbouw methode’ (metodo di construccion) ya cu na momento cu nan drenta, hopi di nan ta menos fuerte den e areanan fisico y mental.

E damanan cu participa por spera u durante e prome fase nan ta baha peso, nan ta forma musculo, nan ta siña tocante e parti di comemento y metabolismo. Tambe, Corporal Leito a indica, nan ta siña tocante trabao den ekipo. El a remarca cu ora cu nan drenta hopi di nan ta custuma di traha riba nan mes, pero cu e experiencia militar nan ta cera como famia y nan ta siña compronde otro. “Esey ta haciele hopi interesante,” el a resalta.

Nicole Godet, trahado social di a trayecto di Formacion Social, ta splica cu su trabao ta yuda y guia den e desaroyo personal di cada participante di e trayecto. “Bo ta haya mucha muhe y mucha homber, di diferente parti di Aruba, diferente background, nan ta pasa den diferente cos diariamente, tin biaha na cas of gewoon den grupo mes y e ora ami t’ey pa apoya nan den e parti ey,” el a indica.

Durante e di dos fase di trayecto, cu ta momento cu nan bay haci nan stage, Godet ta esun cu tin contacto cu tur e companianan cu ta yuda e hobennan cu nan stage. Aki su rol ta pa encurasha e hobennan pa nan sigui cu e bon trabao.

“Tin biaha e participantenan ta cuminsa fada y e ora bo t’ey pa encurasha nan pa sigui, duna nan e empuhe pa asina nan por yega tur nan metanan cu nan a pone den e prome fase pa nan por cumpli cu esey na e ultimo fase,” el a agrega.

E trayecto di Formacion Social pa damanan entre 17 y 24 aña di edad. Tur dama cu ta interesa pa forma parti di e grupo di SVT, Formacion Social cu ta bay cuminsa na augustus por yama na 522-5352 of 522-5351 of por subi riba pagina di Facebook di Formacion Sociaal pa mas informacion.

Coordinador di Formacion Social, Jessica Ras a enfatisa cu tin un limite di cupo y el a haci un yamada na damanan cu ta interesa pa aplica mas pronto posible. Tin un proceso di seleccion, cu ta inclui diferente actividad, pa asina determina si e hoben por participa den e trayecto of no.