Den nos columna di siman pasa nos a papia di “Internet of Things” (IoT) sensors combina cu Inteligencia Artificial (AI) riba e nivel di un pacient/dokter individual. Awo nos ta bay toca e tema di “Smart Hospital” unda den futuro cercano full un hospital medico, unda tur sorto di proceso, esta e servicionan medico brinda door di specialisa, e secretariado cu ta manage afspraak y tempo, te cu e back-office y magazijn tur ta wordo conecta na otro door medio di IoT sensornan y unda AI ta brinda hopi automatisacion y te hasta aumento di servicio brinda na pacient.

Kico ta un Smart Hospital?

Un articulo academico sumamente extensivo over e tema aki ta brinda door di Kwon et al. 2022. (1) Riba un nivel macro-analitico un “Smart Hospital” lo mester cumpli cu e siguiente rekisitonan cual ta describi den e tabel.

En breve, full e hospital mester usa 1 sistema universal digital, tur proceso mester ta completamente digitalisa, mester bin enfasis cu pacient y tambe specialista medico usa herment manera smartphone y tablets. En fin tur comunicacion entre tur departamento mester ta den forma consistente universal y esaki ta brinda hopi diferente oportunidad pa tur sorto di automatisacion.

Si nos zoom in un poco tur pacient den e hospital mester ta conecta cu un dashboard di diferente IoT sensornan cu lo varia pa cada afdeling. Tur e sensornan aki ta conecta cu diferente algoritmo di AI, cual lo no solamente monitor un pacient 24/7 pero lo te hasta adverti e miembro di personal concerni ora cu un pacient mester di atencion prome cu algo echt grave pasa.

Sistemanan di magazijn, back-office accounting tambe lo ta conecta cu sensornan IoT y nan mesun AI, unda lo por den manera inteligente pronostica cuanto diferente suministro y medicamento lo bay tin mester di dje (prome nan caba of bira scars).

E delaster aspecto den un hospital fisico lo ta automatisacion di hopi tareanan “mundano/simpel” door di uso di AI y te hasta Robotics. Pensa e desinfeccion di operatiekamer, trahamento di afspraak, te hasta transportacion di herment y medicamento pa cada afdeling dentro di e hospital.

Futuro: “Hospital without Walls”

Awo nos ta papia di haci un hospital manera HoH full “smart”, pero den futuro ta full e servicio medico lo bira smart y esaki ta encera e cuido pafor di murayanan fisico di hospital tambe.

Tur pacient cu malesa cronico y bou cuido medico di un hospital lo haya su mesun combinacion di IoT sensornan cual lo varia pa cada specialisacion. E sistemanan aki lo wordo midi 24/7 pa AI. Ora cu e algoritmo di AI indica cu tin un problema cu por surgi e verpleegkundige concerni usando full un dashboard avansa lo tuma contacto cu e pacient si ta necesario manera ta wordo ilustra den e imagen.

Brindando Alivio na Aruba su Crisis di Cuido Medico

E mester ta completamente duidelijk cu e meta mas grandi di tur esaki ta spaar sufrimento humano cu malesa ta trece. Atake di curason, stroke, hende cu ta perde pia ta causa sufrimento inimaginabel pa ambos e persona concerni y su famia. Ademas e costonan monetario cu tur esaki ta trece cune cual ta costo pa AZV directo, pero tambe perdida di labor ta un presion enorme pa Aruba. En fin ya caba nos ta wak cu profesionalnan den sector medico ta indica cu nan casi no por cu e werkdruk mas.

E ta mi speransa profundo cu conceptonan di IoT sensors cu AI riba nivel di pacient y specialista y den futuro cercano e “Smart Hospital” por brinda un alivio grandi pa tur nos pueblo cu un dia lo mester haci uso di facilidad medico.

Referencia:

Healthc Inform Res. 2022 January;28(1):3-15. https://doi.org/10.4258/hir.2022.28.1.3 pISSN 2093-3681