Den e delaster tempo cu a pasa mi persona a pone hopi enfasis riba e tema di energia. Esaki debi door cu den un sociedad moderno, prijs di energia tin un influencia masivo riba pueblo den manera directo y indirecto. Awo den e articulo aki nos lo explora kico nos lo por haci den un futuro cercano unda coriente lo ta casi gratis. Nos lo wak cu no solamente e beneficio directo pa consumidor pero ademas pa full pueblo, cu spill-over effects positivo profundo.

Car Pool Social di Vehiculo Electrico

Un propuesta pa un proyecto cu mi persona hunto cu Peter Xing, ex-Hoofd Innovation di KPMG Global a entrega na Minister Ursell Arends tabata uno pa crea un “Car Pool Social” di vehiculo electronico. Lastimamente manera semper ni respuesta a haya, poniendo un bes mas Aruba su cara na berguensa cerca e gruponan sumamente serio manera di Peter Xing.

Transporte ta un necesidad basico, pero pa cada persona individualmente cumpra y sigura un auto apart cu hopi biaha no ta wordo usa 90% di tempo, ta no solamente un mal inversion, pero lastimamente un gasto cu hopi na Aruba no por yega na dje mas.

Den nos propuesta nos kier a introduci e concepto di “car pools” na diferente ocasion strategico rond di e isla, conecta cu un app cu inteligencia artificial y analisis predictivo y cu e autonan ta full electrico.

Un ehempel di un famia di menos recurso na San Nicolas cu tur dia mester bay area hotelero. Usando un auto full electrico, hasta cu e prijs sumamente halto mes di Elmar, un famia cu mester transport fo’i di San Nicolas pa Hotel tur dia (bay bin back) lo sali +/- 95 florin pa luna. Awo imagina e mesun famia aki tin panelnan solar, e prijs di transport lo baha enormemente. Por te hasta bisa cu e lo por costa solamente 22,- florin pa luna na coriente, asumiendo cu e famia den e ehempel aki tin panel solar residencial.

Pero na mesun momento pa un famia di menos recurso cumpra un vehiculo electrico pa 50.000,-+ florin no ta realistico. P’esey mi persona y Peter Xing a enfoca pa e “Car Pool Social”, unda tur famia di menos recurso por usa un auto pa ora nan echt mester di dje, den luga di inverti 50.000,- y 90% di tempo e auto no ta wordo usa.

Agricultura Vertical y Hydroponico Avansa

Un otro parti unda coriente hopi barata lo tin influencia masivo ta den ramo di agricultura avansa. E instalacionnan aki no ta usa hopi awa, pero ta gasta hopi coriente pa cu e control di clima di edificio. Si prijs di coriente baha, agricultura local avansa lo bira mas atractivo ainda, cu lo traduci su mes den reduccion di prijs di productonan agricultural pa full pueblo y ademas reduci nos current account deficit den manera duradero.

Produccion di Concret pa Cas

Den pasado mi persona a skirbi varios biaha di 3D Printing of otro formanan di construccion di cas automatisa. Esaki ya caba por baha gastonan per vierkante meter di construi un cas cu 70%. Awo si nos sigui den e tendencia cu coriente lo bira abundante na Aruba, e prijs di concret/bloki tambe lo por baha den manera fuerte.

Debi cu mas o menos 40% di prijs di bloki ta relata na gastonan di Energia & Transport. Dus e gastonan di material pa construi cas tambe lo baha den manera hopi fuerte, cu lo beneficia tur cu ta soña di un propio hogar.


Trece Companianan MicroSaaS & Super Computing Aruba

En fin si coriente ta abundante elo por wordo usa pa trek aan companianan sumamente avansa den computer Aruba. E idea aki tambe a wordo comparti cu gobernantenan pero manera semper ningun oido a wordo duna na esaki. Den ramonan di geopolitica halto e ta un prioridad inmenso pa Estados Unidos y Union Europeo pa tin nan mesun facilidadnan di “High Performance Computing”, miho conoci como Super Computers. E tipo di facilidad asina ta gasta hopi hopi coriente, pero si en berdad coriente bira casi gratis na Aruba, ideanan asina lo bira hopi atractivo.

Nos Futuro Briyante

Mi persona a enfatisa e tema di energia hopi y pa bon causa, door cu ademas di reduccion den gastonan personal, e spill-overs pa Aruba den un plaso mas largo lo ta hopi profundo. For di transporte, pa cuminda local pa construccion y pilarnan nobo economico. Tur lo haya aporte door di e futuro briyante di coriente casi gratis.