Den cuadro di Innovation Week e siman aki, Oficina di Estadistica (CBS) a comparti cu e innovacion ta haci e proceso di encuesta pa e Censo venidero den 2020 hopi mas facil, y hopi mas ‘live’ cu nunca antes. E resultadonan ta cla den 2 siman caba, cual ta extraordinario.

CBS a caba di ehecuta e Censo Piloto, cual ta un test pa asina determina con por mehora e sistema digital nobo pa colecciona dato, na caminda pa Censo 2020. Desiree Helder, kende ta encarga cu estadistica social demografico na CBS, a amplia riba e aspecto innovativo di e Censo Piloto, cual ta un primicia pa nos isla, mirando cu nos ta e prome isla cu ta ehecuta e Censo Piloto di manera digital. Aworaki e departamento ta comparti resultadonan preliminar di e encuesta, cual nos ta publica na final di e articulo.

Banda di con lihe e departamento por presenta resultado preliminar cu e manera digital di traha, CBS ta indica cu esaki tin tambe beneficio pa pueblo, mirando cu den futuro lo por bay mira resultadonan ‘real-time’ mientras CBS gradualmente cuminsa saca data. Asina lo por mira e progreso mientras ainda ta bishita hogarnan. E parti aki, Helder a indica, ainda ta trahando riba dje, pero e lo bay ta cla pa tempo cu Censo 2020 yega.

Finalmente cu e manera di traha aki, CBS tambe por controla cu e trabou ta haci corectamente, mirando cu por mira riba GPS cua hogar encuestadonan a bishita. E resultadonan preliminar di e Censo Piloto ta sigui aki bou.

Resultadonan Preliminar:

  • Un total di 2.394 hogar a wordo conta cu ta encera 6.402 persona
  • 77% di e hogarnan a coopera cu e Censo Piloto
  • 30% di e hogarnan a dura 30-45 minuut cu e entrevista
  • Di cada 100 persona, 53 tabata hende muhe
  • Di cada 100 persona, 65 ta naci na Aruba
  • Di cada 100 persona, 43 persona ta forma parti di un famia cu ta consisti di un pareha cu un of mas yiu
  • 75% di e hogarnan ta biba den un cas
  • 76% di hogarnan ta doño di nan mesun vivienda
  •  33% di e hogarnan tin inconveniencia di stof den nan vecindario
  • 52% di e hogarnan tin un pushi/cacho di cual 48% di e cachonan y 31% di e pushinan no ta sterilisa
  • 16% di e personanan entrevista tin 65 aña of mas
  • 6% di e personanan entrevista tin un limitacion  y 3% mester di cuido
  • 98% di muchanan (4-17 aña) ta bayendo scol
  • 60% di personanan di 15 aña of mas tin conocemento/habilidad pa traha cu computer/smartphones/internet
  • 64% di personanan di 14 aña of mas ta economicamente activo
  • Di cada 100 persona di 14 aña of mas, 95 ta emplea y 5 no ta emplea