Un tema cu e urgencia di mas halto riba nivel personal pa un ser humano ta salud. Tambe como sociedad salubridad tin efectonan directo y spill-overs indirecto masivo.
Segun un calculacion di Brookings Institute un pais moderno por spera un Return-on-Investment di entre $2 pa $4 pa cada $1 cu wordo inverti den sector di salubridad. Esaki debi na menos morto prematuro y malesa cronico pero tambe miho productividad y mas hende den mercado laboral. Segun Brookings Institute esaki por te hasta reforsa crecemento economico cu 0.4% aña den manera structural acumulativo.
Mundialmente tin un crisis masivo den salubridad. E enbehecemento di e poblacion, e escasez na personal humano den casi tur branche di e sector aki y un explosion di gasto ta poniendo un presion enorme riba sistemanan social di salud. E soño di salubridad pagabel universal ta den un peliger hopi real den te hasta e paisnan di mas rico globalmente.
Aruba no ta un excepcion di e tendencia mundial aki. Pio nos como pais riba un nivel strategico riba e area aki ta para sumamente malo mes. Danki na un combinacion di ambos factornan demografico pero tambe mal maneho gubernamental structural. Tocante maneho malo di Salubridad ningun menos cu Fondo Monetario Internacional (IMF) den nan rapport di 2023 “Kingdom of the Netherlands Aruba” a nota riba pagina 34 cu a conseha pa inverti den sector di Salubridad pero cu ningun pero ningun progreso a wordo nota den e ramo aki di maneho. E siguiente grafico ta di e rapport di IMF na pagina 34.
Nos isla a cuminsa ya caba yega nivelnan cu ami por solamente yama “hopi scur.” Como sociedad ya caba nos ta dicidi di NO opera adultonan mayor cu ta “demasiado bieu”, tambe tin un wachtlijst masivo pa cas di anciano social. Tur esaki cu un fondo di AZV cu lo ta den deficitnan enorme den e decadanan cu lo bin. Esaki seguramente ta basta distopico.
Den mi opinion humilde, e unico speransa duradero cu tin ta den innovacion radical den tur branche di e sector di salubridad. P’esey nos lo dedica e simannan binidero aki di nos serie “innovacion New Deal pa Aruba” na e tema cardinal aki.
Prevencion: Risk Stratification
Prevencion #2: Internet of Things Sensors
Inteligencia Artificial den Eerste Lijn
Hospital2.0 cu Inteligencia Artificial den tur Departamento
Smart Pills
Robot Nurse & Support Automation
Cirugia Robotico
Un Vision di e Futuro
