Studiante di facultad di maneho di hospitalidad y turismo na Universidad di Aruba, Maria Perez tabata riba caya e fin di siman aki hunto cu coleganan studiante bendiendo rifa pa un biahe educativo. Nan ta bayendo Merca pa analisa e desaroyonan cu ta tumando luga eynan y kico por wordo adapta akinan na Aruba pa locual trata e sector turistico.
E studiantenan ta bayendo e estadonan Mericano di Nevada, Las Vegas, Utah y Arizona. Nan kier sa mas tocante e desaroyo tumando luga awor akinan na Merca pa locual ta turismo y ‘trece e mentalidad y desaroyo ey riba nos isla’, segun Maria ta conta nos. E studiante ta splica Bon Dia cu e meta ta pa nan conoce mas con pa target e mercado y kico ta e strategianan actual cu nan ta uzando.
“Mi ta kere algo hopi importante den e temponan aki ta innovacion y esey nos mester mantene”, e hoben ta expresa. E ta bisa cu na momentonan aki e millenials ta buscando algo diferente; e siguiente generacion di hoben kier mira mas innovacion y adaptacionnan di ideanan nobo. E docentenan di Universidad di Aruba a presenta esaki na e studiantenan como meta di proyecto kende ta semper actualisa den loke ta e mercado, y kico ta moviendo bon. “Tur loke nos por gana afo pa trece Aruba bek ta tremendo. Trece innovacion, cambionan y mi ta kere ta hopi importante pa balora loke nos tin. Loke nos tin ta suficiente y mester djis sa con pa aplica e strategianan cu nos tin.”
Desaroyo di turismo na Merca
E studiantenan por a scoge unda cu ta pa bay analisa y studia e mercado pero a scoge Merca. Nan ta di opinion cu Merca actualmente tin un desaroyo tremendo den loke ta turismo, manera por ehempel na Las Vegas. Ora nan bay bishita Las Vegas, e meta ta pa bishita diferente hotelnan y restaurantnan. “Ya cu nos ta un isla turistico nos ta bay restaurantnan y hotelnan pero awor nos ta bay un tiki mas deep. Na e hotelnan grandi por ehempel, e cantidad di cambernan cu un hotel solamente tin na Merca, e convencion rooms, tur esaki e studiantenan kier bishita y purba di profundisa riba nan exito y con por aplica esaki na Aruba.
Reduccion di turismo
Durante e prome kwartaal di 2017, Latino America a conoce un reduccion di 57.6% debi primordialmente na e problemanan cu ta afecta e pais bisiña di Venezuela. Den e prome kwartaal di e aña aki, Venezuela a baha cu 76.4% compara cu aña pasa locual tin su impacto riba e reduccion total di bishitante, particularmente di e region Latino Americano. Esaki segun informacion cu nos a haya for di Aruba Tourism Authority (ATA) aña pasa.
Directora di ATA a bisa cu e diferencia di cifranan den e mercado aki ainda ta keda hopi mas adelanta cu otro mercadonan den Latino America, y tambe den e region di Europa cu tambe Aruba ta uza pa su diversificacion. Aunke nos turismo a cay cu 15% durante e prome kwartaal di 2017 compara cu aña 2016, ATA a yega di bisa cu ya caba den nan proyeccion nan a inclui un bahada for di Venezuela e aña aki. E parti di nan strategia ta esun di trata di compensa esaki. Pero talbes e no ta wordo compensa completo, ya cu parti di e fluho di bishitantenan for di Venezuela ‘no ta turismo real’, sino cu nan ta bin Aruba pa otro motibo.
Strategia riba Merca
Mercado Mericano a representa den aña 2016 alrededor di 56% di e total di nos turismo. “E strategia primordial aworaki ta bo tin cu wak Merca bek”, e directora di ATA a expresa. Den e prome kwartaal di 2017, turismo procedente for di Merca a crece cu un 7.7% compara cu 2016. ATA ta haya cu ainda tin espacio pa e mercado Mericano por crece mas unda nos ta haya volumen di turismo y caminda nos pais ta haya su ganashi mas rapido.
ATA tin un meta minimo di crecemento di Merca cu un 5% aña 2017, ‘pero nos ta pushando mas duro’, sra. Tjin Asjoe-Croes a comenta. Nos a publica aña pasa cu e ta dunando su fruta mirando e resultado den e prome kwartaal di 2017. Esaki ta nifica cu e sector hotelero ta hayando un grado di ocupacion positivo den crecemento den e prome kwartaal di 2017. Tambe tin ganashi pa camber positivo compara cu e mesun temporada aki di 2016, segun directora di ATA. “Mas fuerte Merca ta bo ta mira sigur e traduccion di esaki den sector hotelero tambe.”
Servicio mester keda top
Nos a puntra e studiantenan di Universidad di Aruba kico nan ta pensa di e idea pa bin cu mas hotel na Aruba y/of si tin mester di un moratorio di hotel pa nos isla; pues pa stop e construccion di e proyectonan aki. “Mi ta kere e cantidad di hotelnan cu nos tin actualmente ta tremendo y na su luga. Pero importante ta pa mantene nos servicio on top.”
E studiantenan ta compronde cu ta e servicio cu nos ta brinda na e turistanan ta locual ta caracterisa Aruba, nos amabilidad y servicio na e bishitantenan. Na esunnan cu kier haci un donacion na e studiantenan aki por tuma contacto cu Universidad di Aruba y lo tin diferente premio di e rifa cu ta costa solamente cinco florin.
