Recientemente nos ta tende hopi cu tin un scarsedad inmenso di specialista medico, combina cu e ‘vergrijzing’ di Aruba, y presion grandi riba nos sistema social di seguro, ta crea un stress inmenso pa e sector di salubridad riba nos isla. Debi na esaki nos mester cuminsa pensa den rumbo di innovacion pa posibel solucion pa cu e situacion medico grave na Aruba. Un articulo publica den e corant cientifico Nature, ta introduci e tema di “Generalist Medical AI Agents”. Esaki ta un combinacion di 5 diferente AI Agent.
Tin un AI specialisa den haci diagnostico di malesa, usando e databasenan medico existente (EHR Data), sintomanan clinico y diferente test di laboratorio pa yega na un conclusion medico. E testnan necesario por wordo haci door di praktijkondersteunend medewerkers of verpleegkundigen. Unabes e sistema di AI tin esaki, e por yega na su mesun diagnostico, sin cu mester un dokter humano pa interveni.
Den e di dos fase, un otro AI specialisa den “Treatment Support”, por personalisa full e tratamento di e pacient. Esta cua medicina mester y den ki dosis den un manera ultra-individualisa. E mesun AI aki por tambe pronostica ki riesgonan tin pa complicacion. Tambe en combinacion cu follow-up test, e AI medico aki por indica rapidamente si e trayectoria medico mester wordo cambia prome cu complicacionnan severo tuma lugar. Esaki por preveni hopi problema pa ambos e pacient cu lo tin un miho trayectorio di su malesa cu menos complicacion y nos sistema di seguro medico cu lo spaar bastante fondo dopr di esaki.
Na un nivel di hospital lo tin un “Administration & Coordination” AI, cu lo haci un analisis amplio y automatisa di planificacion di e suministronan cu mester tin den botica y magazijn di hospital, den un manera predictivo. Esaki lo preveni cu lo tin escasez di recursonan medico cu un hospital lo tin mester di dje pa opera optimalmente.
Trahando un “Generalist Medical AI Agent” pa Aruba
Varios articulo den literatura medico di caliber halto a cuminsa traha caba riba e diseño practico di sistemanan di “Generalist Medical AI”, ehempelnan di articulonan relevante ta “A Perspective for Adapting Generalist AI to Specialized Medical AI Applications and Their Challenges” di Wang et al. 2024, “Towards Generalist Biomedical AI” di Tu et al. 2024.
E siguiente overzicht di Wang et al. 2024 ta duna un lista di diferente AI agent cu por usa pa cu esaki.
Despues e autornan cientifico aki ta papia den manera amplio con pa traha un sistema asina, cu ta resumi den e imagen.
Ta ora pa usa Innovacion!
Cu e escasez grandi na dokter medico humano, listanan di espera inaceptablemente largo pa cuido medico y gastonan pa fondo di AZV. Tin un necesidad enorme mes pa usa solucionnan innovativo pa brinda servicio, riba un escala grandi y automatisa. Inteligencia Artificial ya caba a yega nivel di specialista medico humano y awo tin literatura medico amplio cu ta mustra con pa traha “Generalist Medical AI Agents”.
E ta mi opinion cu nos mester cuminsa implementa e solucionnan aki, mas pronto cu ta posibel pa yuda cu e crisis den cuido medico na Aruba. Awo no tin excuus mas, paso e herment y manualnan con pa traha sistemanan di AI medico sofistica ya caba ta completamente disponibel publicamente.
Mi ta spera cu pronto nos por wak un AI Agent medico full automatisa pa brinda alivio na pueblo di Aruba.
