(ElNacional/ABC) – E poblacion Venezolano a registra, den termino absoluto, e mayor aumento di residente stranhero na Spaña durante e prome semester di e aña aki. E cantidad di persona cu e nacionalidad aki cu a cruza Atlantico den e seis lunanan ey y a establece nan mes den tera Spaño a aumenta cu 10.478, pa yega na un total di 73.747 residente, segun dato te 1 di juli di 2017 difundi pa e Instituto Nacional di Estadistica (INE). Esey ta implica un incremento den e periodo ey di 16,6%.
E cifranan ta confirma cu e fluho di Venezolano pa Spaña a intensifica durante ultimo añanan. E aumento di casi 10.500 residente Venezolano ta casi triplica e 3.675 persona registra den prome semester di e aña anterior.
E prome seis luna di 2017 ta coincidi cu e ola di protesta contra regimen di Nicolas Maduro, y e intensificacion di e represion contra opositornan politico.
Encuanto e estadisticanan di inmigrante stranhero -cu pa INE ta un concepto distinto cu esun di residente stranhero na España- tambe esnan di origen Venezolano ta ocupa un lugar importante, cu 12.438, aunke den e caso aki esnan di nacionalidad Marocano (cu 17.634 yegada na Spaña), Colombiano (15.395), Rumano (15.300) y Italiano (12.928) ta dilanti nan. Den e di dos mita di aña pasa tabatin 11.903 inmigrantes Venezolano.
Venezuela tambe ta encabesa e lista di pais di procedencia di e poblacion Spaño cu a yega Spaña durante e prome mita di 2017, dilanti di Ecuador, Reino Uni, Francia y Estadonan Uni. En concreto, di e pais Caribeño a yega den e seis luna ey 5.506 Spaño, den e caso aki un cifra inferior na esun di e semester anterior, cu tabata 6.720.
Diaspora Venezolano
E diaspora Venezolano, forsa tanto pa e persecucion politico contra disidente di e regimen como pa e crisis economico y humanitario cu e pais ta sufri, ta cada vez mas numeroso. Tin calculo cu ta papia di entre 2,5 y 3 miyon di ciudadano cu a bandona Venezuela. Hunto cu Spaña, otro destino importante ta Merca, Colombia y Italia
