EdM Flywheel (1).jpg

WEB a inicia e trabou di instalacion di Flywheel, un sistema cu lo bay warda energia sostenibel.

 

Esaki ta informacion for di un relato di WEB.

 

E tecnica di Flywheel lo stabilisa e fluctuacion di fuentenan di energia sostenibel y consecuentemente e generacion y suministro di coriente. Esaki lo haci e operacion total mas eficiente. Ministernan Mike Eman y Mike de Meza a haci e acto di groundbreaking den presencia di gerencianan di WEB Aruba, Temporal Power y demas invitado. Den cuadro di e proyecto e companianan, hunto cu contratistanan ALBO Aruba y ACE Firm a haci donacionnan financiero na Animal Shelter Aruba, Cas di Cultura y EPI Ciencia y Tecnologia.

 

20 Flywheel – 5MW

E proyecto di warda energia lo resulta den un ‘parke’ di 20 Flywheel cu un capacidad total di 5MW. Flywheel ta forma parti di e plataforma di WEB pa integra energia sostenibel (ARIP), cual riba su turno ta parti di e Aruba su Renewable Energy Strategy (ARES). Esaki ta un paso mas pa logra vision di WEB di ta Greener, Cleaner y Fuel Oil free pa 2020 y ta un solucion mas pa integra fuentenan di energia sostenibel den WEB su red di produccion. Segun plannan e proyecto lo bay ‘live’ den di 4 kwartaal di aña 2017.

 

Energia Cinetico

Un ‘flywheel’ ta un bateria mecanico cu ta warda energia cinetico den un wiel. Energia cinetico ta un forma di energia cu un obheto tin pa motibo cu e ta move. E masa y rapidez di e obheto ta determina e cantidad di energia cinetico. Ora di carga e flywheel, ta uza energia di e red di WEB pa genera un motor cu ta acelera e flywheel pa un speed halto. Ora di descarga, e flywheel ta baha speed, uzando e situacion di e wiel pa core e motor den reverse pa asina e funciona manera un generator. E flywheel lo carga durante momentonan cu tin menos demanda di coriente na Aruba y descarga durante e momento cu e demanda ta mas halto.   

Durante e ceremonia di groundbreaking a hiba palabra CEO di WEB Aruba, Luis Oduber, director di Utilities Aruba Franklin Hoevertsz y CEO di Temporal Power, Eric Murray. Temporal Power ta e compania Canades cu ta suministra e flywheelnan. Tambe a hiba palabra director di AIB, Sr. Frendsel Giel cu a representa e consorcio di instancianan financiero pa cu e proyecto, sigui pa Minister Mike de Meza y finalmente minister presidente Mike Eman.

 

Comunidad sostenibel

Den cuadro di e proyecto,WEB y Temporal, hunto contratistanan pa e proyecto ALBO Aruba y ACE Firm, a haci un donacion na tres organisacion.  Aruba Animal Shelter a haya un donacion di  Awg.5000,-. Stichting Schouwburg Aruba (Cas di Cultura) a haya un donacion di Awg. 10.000,-. E di tres donacion na balor di Awg. 10.000,- a bay pa EPI Ciencia y Tecnologia, specificamente pa finalisa e instalacion di reciclahe di awa na e scol. Di e manera aki e proyecto Flywheel no solamente ta contribui na un produccion sostenibel, pero tambe na un comunidad sostenibel.