Inicio di integridad…? Y kico ta sigui…?

Nos ta experimentando dianan excepcional. Un parlamentario ta renuncia su puesto pasobra e ta envolvi den un problema hudicial y ta opta pa baha y laga su puesto na otro persona. De paso el a declara cu su renuncia lo ta ‘temporal’ pero esey ta parce nos ‘otros cien pesos’.

Unavez bo entrega bo puesto, no ta existi un automatismo pa bo haya e asiento atrobe, a menos cu tin un acuerdo dentro di e partido cu ta bay haci esaki. Esey ta rekeri cu mester tin un serie di renuncia pa haci esaki posible. Pero esey no ta e problema principal. E asunto cardinal ta cu esaki ta pone e reemplazante den un luz menos positivo. Ora bo ta asumi e responsabilidad di un asiento den parlamento, ta di supone cu bo tin e habilidad y capacidad pa eherce e funcion ey, den tur aspecto. Si bo ta bin sinta temporalmente te ora e persona en cuestion caba di regla su asunto, bo ta practicamente ofende bo mes y bo partido tambe lo ta culpable di e mesun acto ey: cada persona riba lista mester por drenta parlamento y haci un trabao digno, sino nan no tin nada ta haci riba e lista ey. Pues laga nos kere cu e apreciable parlamentario tabata bisa esaki pa suaviza e asunto den cual e ta hinca, unda ainda e mester resulta ileso. Nos no ta bay expresa un opinion encuanto e caso, laga esey core su curso pa nos haya sa kico husticia ta haci cu esaki.

Loke ta resalta naturalmente, cu porfin nos a cuminsa yega na e nivel unda un persona den un puesto politico ta mustra e grandeza di renuncia en vista di e problema den cual e ta meti. Algun tempo pasa un ministro na Curaçao a renuncia tambe y a bolbe na su puesto despues cu e asunto a termina na un manera positivo pa su persona. Aya nan ta mas custumbra cu e fenomeno ey, ya cu esaki a sucede varios biaha caba den pasado. Sin embargo, na Aruba e ta un novedad y nos tin aki otro persona cu ta den problema hudicial hopi mas serio, cu no a considera renuncia como parlamentario. Riba su mes no tin ley pa obliga e persona aki pa renuncia, pero e ta un cuestion di etica y moral. Si esey ta ausente, anto no tin manera pa forsa esaki y e reputacion corespondiente ta core pa su cuenta.

Pregunta ta si mester bin legislacion pa obliga un persona pa renuncia, como mandatario y parlamentario. Den caso di empleado publico e asunto ta regla, den e sentido cu por suspende un empleado publico si tin un caso di persecucion penal entama pa un delito. Tambe ora e empleado publico ta den aresto preventivo, e ta automaticamente suspendi. Nos ta tende y lesa bastante comentario confusivo den e asunto aki, unda tin hende cu ta argumenta cu un parlamentario ta un empleado publico, loke definitivamente e no ta y no ta cay bao di autoridad di ningun ministro. En todo caso, manera e situacion ta na e momento aki, etica y moral ta e unico guianan cu tin pa esnan cu ta kere den esaki.

Pero, banda di e caso particular aki, nos ta keda contento cu e señal unico aki, o nos mester desea mas cu esey? Integridad ta un tereno hopi amplio y nos tin un caminda largo pa recore ainda, segun nos opinion. Integridad en general no por existi solamente a base di un gesto corecto de vez en cuando. E mester ta parti di un sistema cu ta promove, vigila, y sanciona, na tur nivel den e aparato publico. Y nos mester actua rapidamente pa crea e sistema di vigilancia aki. Riba su mes a tende algun anuncio bastante prometedor na inicio di e gobierno aki, den forma di un Integriteitsbureau, pa empleado publico, un Camara di Integridad, pa maneha por ehemplo asunto di destaho publico, y mas. Tambe un Ombudsman cu a bolbe anuncia cu ta bay parlamento dentro di poco, ban kere cu e biaha aki si nan ta keda cla. Pero fuera di e Bureau Integriteit, di cual tampoco no ta conoci publicamente kico nan ta haci, nos no a mira nada ainda. Lo ta cu prome cu institui e Camara di Integridad, mester caba di pasa e proyectonan grandi, pa por controla nan solamente ‘after the fact’?

Pa finalisa, algo tocante e Ombudsman cu por bira realidad pronto, si conseho di Raad van Advies no ta haci necesario mas cambio den e ley di iniciativa aki. Ley di Ombudsman, den ningun pais cu a implementa algo similar, ta traha pa broma cune. E ta un intento serio pa mehora e procesonan den aparato publico, pa brinda e ciudadano un trata mas eficiente y sigur mas husto. Pero… esey ta un obligacion di tur gobierno, hasta si no ta existi un Ombudsman. Kico nos kier bisa cu esaki? Cu no mester sinta warda te ora e kehonan cuminsa drenta via e Ombudsman pa cuminsa pensa kico por mehora. Tur gobierno cu ta respeta su mes ta consciente di e deber cu ta existi pa traha continuamente riba mehoracion di servicio. Nos no ta mira tanto di esey ainda…