(ElNacional) – E oposicion Venezolano a acudi ayera na e prome dia di negociacion cu gobierno, despues di varios intento fracasa desde 2014 y cu gobierno no a cumpli cu e acuerdonan firma aña pasa. Ambos partido ta participa den e proceso cu ta continua awe na Republica Dominicana, cu poco margen pa presiona y yega na convenio cu por satisface nan exigencia.
E delegacion di MUD tin un carta so na su fabor: e mayoria den Parlamento.
E arma ta strategico pasobra poder ehecutivo mester di autorisacion di e instancia aki pa emision nobo di debe y otro forma di financiamento.
“Oposicion ta enfrenta un dilema grandi. Si e negocia aprobacion di e debenan a cambio di un reforma electoral cu ta permiti eleccion presidencial mas liber, e lo perde definitivamente hopi di e apoyo popular cu a keda.
Si e no hacie, e negociacionnan ta fracasa y ta wordo desprestigia tambe. E ta den un situacion di ‘perde o perde’. “Oposicion ta hopi debilita; su unico arma ta e mayoria den Asamblea Nacional pa aproba e debenan externo di gobierno. E no tin nada mas: el a perde e mayoria popular y e capacidad di eherce presion cu manifestacion riba caya”, e politologo Angel Alvarez ta opina.
El a indica cu gobierno ta yega na e cita den un crisis interno y internacional di cual e no por scapa sin reforma pa dinamisa economia y haci e competencia electoral mas ekitativo: “Ambos cos ta garantia si nan mester sali di poder pronto y hopi di su hendenan ta core riesgo di persecucion nacional y internacional. E representantenan di Maduro lo exigi e aprobacion di e debenan a cambio di masha poco: libera algun preso politico y talbes un reforma electoral cu no ta kita control di Conseho Nacional Electoral (CNE).” El a agrega cu si oposicion cede, nan por hundi nan mes mas ainda. “Si nan no cede, e status quo lo sigui”, el a añadi.
Den e escenario asina compleho, MUD mester mantene mirada riba su meta principal. Nan no por termina negociacion sin cu nan obtene e fecha exacto di eleccion presidencial. Gobierno semper ta manipula cu e aspecto aki cu na e momento aki ta mas urgente cu e cambio di e miembronan di e Conseho electoral.
Di su parti e presidente Dominicano, Danilo Medina, anfitrion di e dialogo a bisa cu “nos tin e speransa cu nos por saca algo importante pa pueblo di Venezuela.” Medina ta auspicia e dialogo hunto cu ex ministro presidente di Spaña José Luis Rodríguez Zapatero.
