Diaranson anochi den e prome lectura di un serio riba bida marino di Aruba, e publico presente a tuma nota di un iniciativa nobo yama ALFI pa structuralmente combati Lion Fish pa medio di un plan di accion.
Esaki Aruba Reef Care Foundation ta informa nos.
Un sala yen a scucha entre otro Giancarlo Nunes, biologo marino, graduado di Universidad di Groningen, elaborando riba lo ultimo di e maneho di Lionfish na Aruba y ALFI. El a splica e historia di e Lion Fish invasivo, su menasa pa nos eco sistema y e posibel manera pa combati e pisca aki. El a splica di ALFI y e plan di accion. E golnan ta entre otro pa activamente y motiva boluntarionan pa gara Lion Fish, comparti informacion, crea facilidad di compra y benta door di crea un centro di distribucion y tambe investigacion.
Sala yen
E prome lectura di e serie tabata un exito, segun Aruba Reef Care Foundation, cu un sala completamente yen cu un publico diverso y sumamente participativo. Na final tabata tin oportunidad di haci pregunta y cualnan e experto presente a contesta. Por ultimo a saca e ganado di un premio poni disponibel door di Nos Clubhuis Hadicurari y cual a bay pa Erik Nijhuis. “E interes y reaccion positivo di publico ta indica cu tin hopi interes creciente pa bida marino di Aruba y Aruba Reef Care lo sigui concientisa tocante di esaki henter e aña aki.”
Lo sigui cu e lectura riba 12 di april proximo cu Sietske van der Wal, docente di Biologia y boluntario di Fundacion Turtuga Aruba cu lo papia di turtuganan marino di Aruba. Dia 26 di april lo toca turno na Miranda van Breugel studiante di Universidad di Groningen cu lo amplia riba e especienan di Tribon y Raya(Chucho) di Aruba. Na final di april lo anuncia e siguiente oradornan y lo sigui explora bida marino di Aruba.
