Un ley di credito pa consumidor, cu lo pone un limite na e interes cu banconan di prestamo formal y informal mag di cobra, lo ta un realidad si ta pa fraccion di MEP. Cu esaki por protege hende cu ya caba ta den problema financiero contra banconan di prestamo y otro companianan cu awo ta permiti pa duna servicionan financiero hopi caro.
Segun un relato di corant Amigoe, Rocco Tjon, lider di fraccion MEP den parlamento, a bisa: “Actualmente no tin un ley cu ta protege e consumido. Esaki ta e motibo pakico companianan cu ta fia placa of ta bende producto na credito tin biaha ta cobra interes di hasta 30 porciento.” Den esaki, banco di prestamo Aruba Island Finance, tienda di electrodomestico Crown, y e compania di telefonia estatal ta designa como e mayor acreedornan, segun e relato di Amigoe.
Un di e companianan consulta tabatin mas di mil beslag riba cuenta di personanan priva cu no a cumpli cu nan obligacion di pago na tempo, di cual cantidad grandi ta di Island Finance. “Un analisis haci door di Ministerio di Asunto Social na cuminsamento di 2018 a demostra cu en berdad e problema di debe na Aruba ta hopi grandi y ta contribui na hopi problema social”, segun Tjon. Segun Tjon, ta hopi biaha hende cu ya caba tin problema financiero, cu ta fia placa na un luga otro cu banco y/of ta cumpra articulo na credito.
Parlamentario di MEP, Endy Croes, ta trahando riba un iniciativa di propuesta pa un ley cu lo protege e consumidor den situacionnan asina. “Mi ta bezig pa cuater pa cinco siman caba”, Croes a bisa Amigoe for di Corsou, unda e ta pa reunion Tripartite. “Motibo ta e vonnis di un caso na 2019 contra Island Finance, despues di un caso entama pa un cliente. Hues a duna veredicto na final cu Island Finance mester cobra un interes maximo masa riba e averahe di interes pa prestamo personal di banconan regular. Esey tabata e tempo ey 18%, mientras cu Island Finance tabata cobra interes di 27.25%. Nos ta preparando un iniciativa di ley unda nos ta pone un maximo di 18% como base pa tur banco di prestamo, tambe pa compra di un producto cu credito. Awo ta sali afo cu hende ta haci un compra y pa motibo di interes, hende ta paga hasta dos pa tres biaha e prijs actual di e producto.
Siman pasa mi a lesa ainda cu Banco Central di Aruba tambe ta bezig cu un iniciativa di ley similar. Otro siman mi ta bek na Aruba. E ora ey mi ta bay den combersacion cu Banco Central pa mira si nos sigui cu nos propio proyecto of bay hunto cu nan iniciativa. Lo mas importante ta pa bin cu un ley cu ta protege consumido contra banco di prestamo sin restriccion y interes demasiado halto, di cualkier manera”, Croes a declara na Amigoe.
