Ayera, comunidad Dominicano a celebra nan di 180 aniversario, un fecha importante pa Republica Dominicana. Na Aruba e comunidad Dominicano a conmemora e fecha aki cu un acto special ayera mainta ariba e Plaza Juan Pablo Duarte. Pa tin un bista ariba e sentimento di e diaspora Dominicano na Aruba, Bon Dia a combersa cu Ingris Molina, un dama naci na Republica Dominicana pero cu a haci Aruba su hogar.
Ingris a nace na Republica Dominicana. Cu un edad jong el a subi avion dia 17 di september 1986 y a bin biba na Aruba, pa bin biba cu su mama. El a studia accounantcy na Liceo Victor Estrella Liz na Republica Dominicana y aworaki e tin su propio negoshi na Aruba, LeTopaz Beauty for U.
Ingris ta conta Bon Dia Aruba cu for di cu el a yega Aruba for di Republica Dominicana, tabata te despues di cinco aña el a bishita su pais di origen back. Despues di esey na varios ocasion el a yega di bishita su pais di origen, pasobra su yiu muhe tabata den mundo di modelahe y tabata competi internacionalmente y un di e concursonan ey tabata na Republica Dominicana.
El a sigui conta cu aworaki e tin mas di cinco aña sin bay Republica Dominicana, y algun cos cu e ta sinti hopi falta di dje ta e calor di e hendenan, e lugarnan manera riu, montaña… y un persona hopi special na su curason.
Ariba loke ta trata diferencianan entre Republica Dominicana y Aruba cu ta sobresali, Ingris ta remarca cu e ambiente Latino, e manera di deal cu otro. El a lamenta cu na Aruba el a yega di experimenta discriminacion, y e ta considera esaki tambe un punto di diferencia cu ta sobresali.
Den contexto di celebracion di cultura Dominicano riba e dia di Independencia, Ingirs a bisa cu un di e cosnan cu e ta encanta mas ta e cuminda Dominicano, y su cumindanan faborito ta e sancocho, locrio y asopao, cumindanan cu ta haciele corda riba su dianan cu e tabata ainda na Republica Dominicana.
Por ultimo, como un stranhero, ciudadanonan Dominicano cu a bin Aruba y haci e isla aki nan hogar, Ingris tin un mensahe special pa e comunidad di inmigrantenan na Aruba:
“E ta duro ora bo sali for bo pais pa un miho manera di bida. Den mi caso, mi a bin hopi jong y mi por a integra y adapta na Aruba su cultura y su hendenan sin lubida mi raiz. Pero a mi lo bisa abo cu a inmigra, respeta y adapta. Aruba no ta di un, Aruba ta di nos tur, nos tur cu ta aporta na su crecemento. Duna danki pa e portanan cu ta habri y sea agradecido.”
