Dialuna ultimo e interes di publico tabata grandi pa atende e charla presenta pa sr. Theodore (Ted) Johnson, sra. Marlene Hernandez Casillas y sr. Stan Kuiperi den cuadro di Dia Internacional di Derecho di Autor y 25 aniversario di Instituto Pedagogico Arubano(IPA).
Sr. Mirto Lacle como organisado di e actividad cultural aki den su condicion di promotor cultural, linguista y literato a duna un introduccion riba e temanan cu cada orador a presenta: Sr. Johnson kende ta Notario di ofishi a papia di su obra “A Lee Chip: a dictionary and study of Saban English” caminda el a trata parti grandi di idioma, historia y cultura di Saba. E presentacion di sr. Johnson a produci hopi pregunta.
Sra. Casillas di ‘Museo de Las Americas’ di Puerto Rico a papia riba ‘E Indjan y herencia Africano na Puerto Rico’. E directora di e museo prestigioso aki a bisa cu nan tin dos sala dedica na herencia indjan y Africano na Puerto Rico. El a haci un recorido historico riba presencia indjan y formacion di e sociedad Caribeño contemporaneo.
E artista Arubiano Stan Kuiperi a papia riba su trabou artistico tocante e tema indjan y e Cacikenan cu a goberna nos region durante e periodo pre-colonial y colonial, y e forma con nan a wordo practicamente extermina. El a reconoce cu a bin cu e charla aki varios biaha y idea ta pa haci mas biaha posibel. E ta un proyecto di arte cu a cuminsa na 2011 den cuadro di e Prome Bienal di Arte Contemporaneo na Aruba. “E ta trata parti di nos historia, educacion y identidad y esaki ta un di e proposito cu e ta keda ripiti”, el a bisa.
Sr. Lacle ya caba a anuncia un proximo version di Sason Cubano pa dia 22 di mei venidero na Cas di Cultura. El a laga sa cu e aña aki Sason Cubano ta wordo dedica na Puerto Rico y Cuba. E biaha aki lo wordo haci honor na e canta autor Portoriqueño Daniel Santos “E Hefe” kende a yega di presenta varios biaha na Aruba.
