Ingeniero Marlon Croes, DOW: ”Caretera sin banchi no ta nifica cu e lo ta di mal calidad”

Proyecto Green Corridor ta continua cu trabaonan di renobacion. A cuminsa cu ponemento di fundeshi riba caminda y cu transcurso di aña pasa a keda haci’e diki y yena esey cu awa pa yega na e grado particular cu tin mester. 

Segun Marlon Croes, Director di DOW, a pone e prome parti di azeta caba pa despues cuminsa pone asfalt riba dje. Ainda e fecha exacto pa cuminsa pone asfalt no ta conoci, pero en tanto DOW ta tumando tur trabaonan preparatorio pa cuminsa cu e brug di Spaans Lagoen y aki tin diferente trabaonan tumando luga, segun sr. Croes, cu mester keda cla prome pa nan por sigui cu e resto cu falta. Pa locual ta construccion di  brug, tin diferente medidanan preventivo cu tin cu wordo tuma segun sr. Croes pa asina maneha e riesgonan y yuda mantene medio ambiente den un balans. Esaki ta algo hopi importante pa DOW y mirando cu Spaans Lagoen ta un area delicado, contratista ta haciendo su best pa tuma e medidanan necesario conhuntamente cu e team di DOW. A busca sosten for di Alterra – Landbouwschool Wageningen for di Hulanda – cu a yega di bin Aruba caba pa yuda stabilisa parameters y wak e reportahe cu ta bay mustra tur e riesgonan cu tin pa preveni cu algo sosode, y tambe pa tin solucion productivo si algo mester bay fout prome cu sigui cu trabao. 

No tin mester di banchi
Ultimamente tin diferente keho ariba calidad di trabao segun sr. Croes pa motibo cu e camindanan no tin banchi di beton. Segun sr. Croes, locual mester ta consciente di dje ta cu na Aruba tin caretera sin banchi cu a wordo traha 25 aña pasa cu ainda ta den bon condicion. sr. Croes ta insisti cu no ta pasobra no tin banchi cu e lo ta di mal calidad. Na Hulanda, America y Italia pa nombra un par, nan ta traha camindanan sin banchi pa motibo cu e ta un sistema di traha caretera caba y esey e contratista aki na Aruba ta bay aplica. Como gobierno, a specifica kico ta e calidad di caminda cu tin mester den tur aspecto, pero e riesgo ta wordo transferi pa sector priva pa nan deseo, pa nan construccion, nan mantencion y pa nan financiamento di dje. Segun sr. Croes, DOW no por djis bisa cu nan kier un banchi pa motibo cu lo hala e riesgo cu a wordo transferi pa sector priva bek pa gobierno. Riba contract ta para cu ta wordo paga si e caminda ta disponibel pa automobilista por uza y bao di condicionnan specifico; por ehempel si tin buraco of cualkier otro problema ta e contratista ta para responsabel pe.

Pa locual ta Reportahe di efecto riba medio ambiente (MER= Milieu Effecten Raportage) , segun sr. Croes tin 2 MER cu ta cla y ta den fase di produccion pa haci esaki oficial. E puntonan di mas importante di e reportahenan aki ta cubri e cuido di matanan di mangel, cuido di piscanan, nos parhanan, pa no contamina e awa cu azeta y den general pa no stroba e funcionamento di naturalesa. Ta trahando cu un sistema totalmente diferente cu segun sr. Croes ta enfatisa riba cuido di medio ambiente.