(AP) – Riba e mesun dia cu Frances Haugen tabata testiguando dilanti Congeso tocante e dañonan di Facebook y Instagram na muchanan den 2021, un ex-director di ingenieria na e gigante di rednan social tabata mandando un e-mail alarmante na CEO di Meta, Mark Zuckerberg tocante e mesun topico aki.
Arturo Bejar, conoci pa su experticio den combati acoso online, a conta na Zuckerberg con su propio yiu tin experiencianan preocupante cu Instagram. Sinembargo, e ta conta cu su preocupacionnan y advertencianan no a ser scucha, e diamars tabata Bejar su turno pa testigua dilanti Congerso. “Mi ta dilanti di boso awe como un tata cu experiencia personal di un mucha cu a ricibi avancenan sexual no desea riba Instagram,” el a conta un panel di Senadornan Mericano.
Bejar a traha como director di ingenieria na Facebook desde aña 2009 pa aña 2015, atraendo atencion amplio pa su trabao den combati bullying cibernetico. El a pensa cu cosnan ta birando miho sinembargo entre sali for di e compania y bolbe back den aña 2019 como contratista, Bejar su propio yiu muhe a cuminsa haci uso di Instagram. “Su persona y su amistadnan a cuminsa tin experiencianan malo, incluyendo avancenan sexual no desea repetitivamente,” el a testigua diamars. “El a reporta e incidentenan aki na e compania y nan no a haci nada.”
Den aña 2021 su nota, Bejar a delinea un “buraco critico” den con e compania ta trata dano y con e personanan cu ta usa su producto, mas tanto hendenan hoben, ta experiencia e daño. “Dos siman pasa mi yiu muhe di 16 aña a haci un publicacion tocante auto y un persona a comenta ‘bay bek cushina.’ Esaki tabata sumamente doloroso pa su persona pero na mesun tempo, e comentario ta leu di ta den violacion di e politica y esaki ta nifica cu e persona aki lo bay otro perfilnan y sigui plama su ideologia misogeno. Mi no ta kere cu politica/reporta of tin mas revision riba contenido ta e solucion.”
Bejar a testigua dilanti un subcomite di Senado riba diamars tocante rednan social y e crisis di salud mental den hobennan, sperando cu lo por trece mas bista riba con ehecutivonan di Meta, incluyendo Zuckerberg, tabata al tanto di e daño cu Instagram tabata causando pero a scoge pa no haci cambionan necesario pa atende esaki.
Segun Bejar, Meta mester cambia con nan ta maneha nan plataformanan cu un enfoke riba atende acoso, avancenan sexual no desea y otro mal experiencianan aunke e problemanan aki no ta den violacion directo di politicanan existente. Por ehempel, manda mensahenan vulgar na hobennan no ta necesariamente kibra Instagram su reglanan, sinembargo Bejar ta conseha cu hobennan mester por tin un manera di bisa e plataforma cu nan no kier ricibi e tipo di mensahenan aki.
