Manera a keda publica den medionan local, dia 31 di December lo mester tabata e ultimo dia di Ing. Jossy Figaroa den e funcion di director di Aruba Ports Authority. Sin embargo, aña a habri cu e noticia cu e profesional Arubiano a haya peticion di Gobierno pa keda temporalmente na mando di e entidad importante aki. Figaroa a acepta, admitiendo cu e ta sinti un responsabilidad pa tur cos cana bon mientras ta dicidi ken ta su sucesor y cana cune e proceso di transicion.

Gobierno a pidi Figaroa pa keda algun luna mas; probablemente ta 3 luna, similar na e caso di Humphrey Odor. E director di APA a indica cu Minister Danki Oduber  kier por conta ainda cu su experticio mientras ta finalisa cu e seleccion di un director nobo. Pa Figaroa no tabata un decision dificil ya cu semper e ta dispuesto pa traha na bienestar di su isla. Tin entendi cu for di augustus ultimo cu a publica e vacatura, a repasa e diferente solicitud cu a ricibi y tambe a tene entrevista cu varios candidato.

Ainda Gobierno no a tuma e decision final pasobra, segun Figaroa, ta sinti cu e persona cu bin pa tuma over e riendanan di Aruba Ports Authority, ta bay carga un responsabilidad  grandi. Cu esaki ta referi no solamente na e operacion actual, pero tambe na e proyectonan importante cu ta canando caba. Minister Oduber kier wak un persona hoben pa e posicion y asina inyecta sanger y mentalidad nobo den APA, pero den mesun rosea kier tambe experticio y experiencia. Pa e ultimo aki, Figaroa lo brinda su guia mientras cu e ta wanta un rato riba e ofertanan cu su mes a ricibi for di sector priva.

Entre e candidatonan pa bira e director nobo di APA tin Humphrey Tromp, kende ta e actual Gerente Financiero y a traha hopi di cerca cu Figaroa. Tromp, kende a traha tempo di Alfonso Boekhoudt, tambe a haya solicitud di Gobierno pa extende su contrato. Adicional na e maneho di waf di crucero di Oranjestad, APA tambe ta encarga cu waf di carga na Barcadera y e desaroyo di henter e waterfront bou di un proyecto denomina ‘Port City Oranjestad’ cu lo inclui areanan comercial, residencial y di recreacion publico.