Tratamento di presupuesto a continua ayera, sin mehoracion di e gritamento riba e tribuna publico, pero ta parce cu esun cu ta dirigi reunion, finalmente a dicidi cu e no ta pasa pa e medida mas fuerte, e desocupacion di e tribuna. Asina e ta duna e impresion cu el a perde e bataya y cu mescos cu tur su antecesornan, ta resigna y acepta cu, manera nan ta bisa na Hulandes:de straat regeert. Caya ta manda.

Nos realmente ta perdiendo speransa cu algun dia lo tin un presidente cu ta percura pa un ambiente propicio pa tene un reunion digno di loke nan mes orguyosamente ta yama e organo mas halto di nos gobernacion. Esey ta implica tambe cu lo mester acepta cu e desorden di ayera lo permanece cu nos pa e proximo cuatro aña, si no sucede un milagro. Pa esunnan cu ta pro orden y respet un derota moral mas, pero por ta cu ta nos tin demasiado expectativa.

Tabatin di otro banda suficiente motibo pa emocion y conmocion den e sala, cu no tabatin tanto di haci cu e presupuesto, pero tabata mas dirigi riba e handel en wandel di e gobierno anterior, mas specificamente e anterior ministro encarga cu infrastructura. Naturalmente pa basta tempo caba e fechorianan cometi den e puesto ey ta conoci, y ta logico tambe pa conclui cu e perdida di 10.000 voto den ultimo eleccion tin hopi di haci cu esaki.

Di loke e actual ministro a trece dilanti na detaye tocante e manera con e ministro tabata opera, casi completamente desliga di e departamentonan concerni, aceptando por ehemplo miles di peticion pa tereno na su oficina, na su cas, dilanti cas, y ken sa unda mas, cu aparentemente nunca a yega e departamento cu mester maneha e peticionnan. Nos no tin problema pa kere cu esaki a bay asina, pasobra tabata bon conoci den comunidad cu e ministro aki bo no mester a acerca su persona na oficina, pero djis sigui e pista di klinker den e bario anto bo ta yega unda bo mester yega.

Pero, e tipo di denuncia aki ta duna nos di pensa. E no ta pinta solamente e imagen di un hende cu ta completamente incapaz pa fungi como ministro, pero tambe cu el a haci un daño hopi grandi na comunidad. Di un banda e interes genuino di miles di ciudadano cu a haya un hende tuma nan haci completamente, cu e consecuencia cu nunca nan tabatin un peticion oficial entrega, y por bay reclama e ex mandatario personalmente, pero cu esey ainda nan no a haya tereno pa traha cas.

A toca e aspecto tambe di e miles di camber di hotel pa cual e mesun ministro aki a compromete nos pais, mientras cu e sa masha bon cu 10 aña pasa caba a cuminsa papia di un moratorio riba hotel y su mes partido 8 aña pasa a aproba un mocion den parlamento pa yega na un tal moratorio. Y pa no cuminsa papia mes di su maneho encuanto admision, unda pa añanan largo a frustra tur intento pa hiba un maneho cu por califica como rasonabel.

E pregunta grandi ta, kico mester bay sucede, pa remedia e ruina cu e ex mandatario aki a laga atras. Y no ta trata solamente di su persona, pero ken tabata e 68 persona den su alrededor cu a yuda perhudica nos pais? Cuanto di nan a yega di haci algo, lanta nan bos o duna un señal cu tabatin cosnan contra ley ta tumando luga? E actual ministro a indica claramente cu hasta tabatin caso di falsificacion, concretamente cambio di fecha di documento, unda lo ta logico cu no ta e ex ministro so tabata haci e cosnan aki.

Tur e detayenan aki ta pinta un imagen di un administracion publico desastroso, cu nos no ta bay mehora simplemente dunando e siguiente mandatario nos confiansa. No pasobra cu nos no ta confia, te ora lo contrario keda proba, pero pasobra e ta costa un labor duro pa reconstrui e departamentonan concerni, eliminando tur e mal practicanan cu tabata na orden di dia, den emision di tereno, den permiso di construccion, den maneho di stranheria, etc.

Den tur e detayenan cu e ministro a trece dilanti, ta describi departamento di gobierno, unda coordinador di ex ministro lo tabatin yabi di departamento unda nan por a drenta ora cu nan kier, pa uza computer y papel membreta di e departamento…, pa elabora documento cu e departamento no conoce. Aki nos por mira cu a desvia practicamente completamente di e reglanan normal di separacion di responsabilidad di e departamento, y e responsabilidadnan di e horda di coordinador. Aki nos ta toca e mero curason di e deterioro di tur norma di bon gobernacion.
Kico mester sucede?

Un opcion ta considera un parlemantaire enquête, un investigacion cu parlamento ta ordena, despues di cual e resultadonan por bay Ministerio Publico, pa evalua e echonan eventualmente castigabel, motibo pa OM cuminsa caso penal. E hecho cu tin un ministro acusa di corupcion no ta suficiente pa kere cu den resto di gobernacion tin cosnan a pasa cu no por keda honra cu impunidad.