Recientemente, na mesa di redaccion di Bon Dia Aruba a yega informacion di problema cu infrastructura di edificio di Dr. Horacio Oduber Hospital (HOH), e biaha aki, mustra buraco den plafond.

Riba potret y video cu Bon Dia Aruba a ricibi, por observa con e plafond ta daña, y algun pida di material ta riba vloer. Tambe por nota cu ariba tabatin un tuberia cu ta leak, directamente riba vloer.

Esaki sigur ta preocupante mirando cu segun a informa Bon Dia Aruba, e area aki ta den e parti di hospital cu a renoba recientemente.

Den pasado, e renobacion di HOH a conta cu cantidad di contratempo y problema. Na juli 2023, Miembro di Parlamento, Sra. Aquannette A. Gunn, a dirigi un serie di pregunta na Minister di Salud Publico y Turismo, Sr. Danguillaume Oduber, tocante e situacion di Dr. Horacio Oduber Hospital (HOH). E preguntanan tabata enfoca riba e proyecto di expansion y renobacion di HOH cu a inicia na 2014 y cu mester a keda entrega na 2018, pero cu te dia e fecha ey, no tabata finalisa. E proyecto aki tabata basa riba un plan di exigencia cu expertonan di hospital a traha. E carta a menciona tambe e disputa entre e compania di construccion OHL Arellano y SOGA, cu a resulta den e paralisacion di trabao na e proyecto di renobacion di e edificio conoci como e ‘hospital bieu’. Sra. Gunn a pidi pa Minister Oduber informa Parlamento kico ta e suma cu SOGA a paga OHL Arellano na e momento cu ambos partido a dicidi di separa for di otro. E preguntanan aki tabata representa un intento pa clarifica e situacion di e proyecto di expansion y renobacion di HOH y pa busca transparencia den e maneho di e situacion. Empleadonan di HOH y e demas ciudadanonan tabata preocupa cu un proyecto cu mester a keda entrega den 4 aña pero a cumpli dos lustro sin conclusion. “Nos hospital ta un asunto di bida y morto y nos merece un solucion pronto. Pero en bes di esey, nos ta haya un proyecto cu a sali for di control, cu un presupuesto cu a subi for di 252 miyon florin pa un suma asombroso di alrededor di 400 miyon florin” a comenta e tempo aya.

Esaki despues cu na maart aña pasa a bira conoci cu compania di construccion OHL Arellano Construction Company a duna orden na sub-contratistanan pa stop trabao di renobacion na HOH. A bira conoci cu a permiti pa e desaroyador bandona e proyecto y laga contratistanan local completa e trabao. Den e combersacionnan aki tabata cuestiona con por ta cu un proyecto cu a cuminsa na 2013 ainda no tabata cla na 2023.

Igualmente, doño di e edificio unda HOH ta ubica, Stichting Onroerend Goed Aruba (SOGA) a financia e proyecto cu tabatin un proyeccion inicial di 252 miyon florin. Sinembargo, durante cu e proyecto tabata andando, mas trabao a bin agrega na e proyecto y asina e presupuesto a keda aumenta te yega alrededor di 400mil florin, manera Gunn a indica den su comunicado.

SOGA eventualmente a “confirma cu en berdad tin un desacuerdo entre SOGA y e General Contractor

OHLA, di e proyecto di Expansion y Renobacion di Dr. Horacio Oduber Hospital. A base di e

desacuerdo riba extension di e terminacion di proyecto e contratista a tuma e decision pa no sigui

cu e proyecto di construccion. SOGA ta tumando tur e pasonan necesario pa sigura cumplimento cu

e condicionnan di e contrato y su derechonan,” segun a informa den un comunicado di prensa na maart 2023.

Y asina keto bay e construccion no a keda finalisa. Y mientras tanto, e partinan cu si a keda renoba, ya ta presentando problema cu ta rekeri mantencion, manera Bon Dia Aruba a haya sa. Esaki ta crea inconveniencia pa e trahadornan di hospital, pero tambe ta keda un muestra di mal maneho cu ya pa mas cu un decada, pasando di un gobierno pa otro, ta continua pa cu e renobacion di hospital.
Mientras tanto, ciudadanonan di Aruba a keda cu un peso enorme di debe pa cu e proyecto aki.