Diahuebs atardi, Cyrielle Lacle Diaz, hefe di ekipo di Patologia y Ezzard Cillie, director di Hospital Dr. Horacio Oduber a ofrece un conferencia di prensa pa enfoca riba cambionan y ekipo nobo den departamento di Patologia, como tambe ofrece un actualisacion di investigacion cu ta andando na laboratorio tocante presunto fraude.

Lacle Diaz informa cu desde cu nan a muda na edificio nobo di Medical Office Building, e orario pa entrega di muestra ta desde 6or y mey di mainta te 3or y mey di atardi y tambe ta conta pa resultadonan di PAP Test.

Lacle Diaz a duna di conoce cu nan te reorganisa, standarisa y modernisa e departamento, pa asina nan logra traha cu calidad y pa nan por logra haya e acreditacion. El a comenta cu nan mision ta pa incorpora patologia moderno y esaki ta encera digitalisacion di e departamento, cu ta un rekisito pa nan por traha cu e reglanan stipula door di Asociacion Hulandes di Patologia y tambe Instituto di Calidad di Hulanda cu ta e Conseho di Acreditacion.

Di mesun manera, el a splica cu desde aña pasa nan tabata bezig cu proceso di cambio di ekipo, cu den futuro nan lo brinda un miho servicio pa pashentnan, como diagnostico y cuido.

Den esaki, el a referi cu nan a haci un inversion di aproximadamente 3 miyon dollar. El a specifica cu esaki ta dirigi tambe pa diagnostico di PAP Test, den cual nan tin un mashin nobo, loke ta nifica cu e metodo cu nan a cuminsa aplica ta duna resultadonan mas lihe.

Den pasado, el a comenta cu e resultado di PAP Test por dura seis siman y cu e mashin nobo e pashent por haya su resultado den 5 dia. Pa remarca esey el a bisa cu nan tin un porcion chikito cu ta wordo haci ainda den exterior.

Lacle Diaz a expresa cu e manera con nan ta haci e PAP Test actualmente ta pa via di un brush, cu ta recoge e muestra y e ginecologo ta pone esey den un pochi cu tin un likido den dje y cu ta conserva e material. E diferencia ta cu hopi biaha anteriormente tabatin material perdi y aworaki cu e metodo nobo nan por haci mas test.

Director di Hospital Horacio Oduber, Ezzard Cillie a señala cu esaki ta un avance grandi di tecnologia, den cual e mesun tecnologia ta duna siguridad cu casi e no por faya den dje. Si e ta faya, semper ta existi un backup, locual e sistema convencional cu nan tabatin anteriormente no tabata ofrece esey. Laboratorio tabata depende hopi manualmente y tambe di individuonan y den futuro esey no ta bay ta asina mas.

Tocante e investigacion di posibel caso di fraude na laboratorio, cu a cuminsa lunanan pasa, Cillie a comenta cu e no por bisa hopi, pero esey casi ta yegando na su fin. El a sigura cu el a ricibi e ‘Onderzoek Plenair’, cu ta casi 250 pagina, cu aworaki nan mester revisa y abogadonan ta bezig pa wak si por confirma locual tin ideanan cu ta berdad riba hechonan.

“E trayecto ey nos ta canando aworaki, asina cu esey ta cla nos mester duna un contesta y esey lo caba nan reporte”, Cillie a manifesta.

El a afirma cu esey lo cuminsa den dianan aki, pa motibo cu tin asina hopi cos cu decision mester cay, kico ta para den futuro di empleadonan ey, pero asina mes a informa cu e investigacion a yega te na Hulanda cu interogacion di otro personanan involucra.