Informador tin un ‘job description’ un tiki straño

Lider di fraccion di AVP, Marlon Sneek a expresa su desconfiansa riba e desaroyo cu ta tumando luga pa e formacion di un gobierno nobo despues di eleccion.

Ayera el a bisa cu nos por a mira cu un informador a wordo apunta cu un “job description den mi concepto un tiki raro”. Sr. Sneek a haya straño e tarea cu Arie Swaen a ricibi como informador pa bay sondea of analisa e parti financiero pa wak si e decisionnan cu mester wordo carga of tuma no ta uno politico.

Pues e lider di fraccion di AVP, ta haya esaki ‘Hopi raro!’, specialmente si nos mira e situacion di nos pais actualmente. El a laga sa cu e situacion financiero di nos pais a keda expresa den e ronda cu Gobernador di Aruba tabatin ora cu el a sinta entre otro cu director di departamento di Finansa.

El a indica cu e director di e departamento aki a trece bon cla cu e situacion financiero publico no ta alarmante. “No ta Marlon Sneek ta director Werleman (di departamento di finansa) ta papia akinan”, el a bisa.

Parlamentario Sneek a elogia e maneho financiero cu e gobierno a hiba durante e ultimo 8 aña, ora cu nan a hereda un pais sin un cuenta anual presenta, cu problema di finansa y cu un economia stagna, segun e.

E ta haya cu e gobierno cu kier sinta awor kier desacredita e gobierno ultimo pa asina busca argumentonan “papiando di un situacion desastroso cu a keda atras”, pa anuncia cu medidanan ta bay bin den direccion di pueblo.

Segun sr. Sneek un expresion cu e ta lamenta aworaki ta esun di ‘desaster’, despues di e logronan y calidad di bida logra durante e ultimo gobernacion aki. E ta mira cu tin cooperacion entre e instancianan cu ta papiando aworaki pa desacredita e gobierno aki. E ta kere cu esaki ta ‘un opdrag’ cu nan a haya den cuadro di formacion di e gobierno nobo. E no ta compronde e actitud aki, despues cu tur e personanan aki a caba di bishita Gobernador y nan a splica kico ta e situacion financiero real di e pais aki.

E ta cuestiona e echo cu e profesionalnan aki cu ta traha cu cifranan a wordo poni un banda. Mientras cu awor nan ta papiando di bin cu otro grupo of instancia cu mester haci un evaluacion economico pa hustifica medidanan, segun parlamentario Sneek.