ORANJESTAD – Masha poco informacion relevante minister di transporte publico, Chris Romero a los pa prensa relaciona cu e accidente di e avioneta, Piper PA-38 (Tomahawk) cu matricula N23408, cu a cay diamars anochi na Calbas. Tin indicacion fuerte cu e accidente aki a wordo causa pa falta di combustibel.

Sinembargo, el a dicidi di bin cu e conferencia aki pa trece trankilidad, debi na e situacion actual rond di Venezuela. E echo aki tin hendenan preocupa, y un incidente asina ta pone e hendenan specula diferente otro cos, segun e mandatario.

E minister a afirma cu un investigacion ta tumando luga, y te ora cu esaki no ta bin cla, e ta masha reserva pa divulga informacion. El a confirma cu e avioneta a sali for di Higuero (Republica Dominicana) y tabatin dos persona abordo di e nave: Un di nacionalidad Venezolano, y otro di nacionalidad Mericano.

El a abstene di divulga e nomber di nan. Sinembargo, Bon Dia Aruba a haya sa for di medio di prensa Dominicano cu ta trata di e piloto Venezolano, Luvin A. Carrero y e pasahero, Alexis Sanchez. Te ainda esaki no a wordo confirma ni nenga oficialmente.

Aunke e mandatario tabata masha reserva pa duna informacion, contestando pregunta di prensa, el a indica cu e no tin informacion cu tabatin algo considera como sospechoso of contra ley den e sitio di e accidente aki. Tambe ta materia di investigacion e tempo di vuelo di mas cu 5 ora for di cu e avioneta a sali for di Republica Dominicana pa Aruba. E ta haya cu ta basta tempo, pero e no ta un experto pa bisa si un avioneta asina por bula 5 ora largo.

Mirando cu e avioneta a cay den un area cu tin hopi naturalesa ta haci dificil e acceso pa yega eynan. Nan ta considerando kico ta bay haci cu e resto di e avioneta di un motor, mirando cu nan no kier afecta naturalesa. Igualmente, e resto di e nave aereo ta wordo cuida pa evita vandalismo of hortamento.

Sinembargo, Romero a declara cu ora un suceso asina ta tuma luga, bo ta haya hopi speculacion. E informacion cu el a duna ta a base di loke Directie Luchtvaart a dun’e. Pues e no por papia di informacion cu a bini for di Rep. Dominicana.

Manera e mandatario a yega di informa caba pa medio di un comunicado di prensa, e investigacion a cuminsa diamars nochi mes y lo wordo conduci segun reglanan internacional vigente di ICAO su Anexo 13. Autoridadnan internacional manera NTSB (como cu e avion ta matricula na Merca) a haya un notificacion oficial caba for di Aruba.

Expertonan di Directie Luchtvaart, cu entrenamento special pa investigacion di accidente, ta encarga cu e investigacion preliminario cu ayudo di otro instancianan. E procedura ta dicta cu asina cu e rapport keda revisa y aproba pa un comision independiente, esaki lo keda publica.

“E investigacion ta andando. Mi no por bisa mas cu esey…,” el a laga sa. Pa awor e no lo duna ningun informacion specifico pa asina e investigacion por tuma luga den tur trankilidad.