Segun un relato recien di e portal di noticia Ret Karibense, Ministerio di Medio Ambiente a publica informacion falso tocante e efectonan ambiental di e hotel Secrets, cual recientemente a cuminsa construi na Baby Beach.
Tabata na cuminsamento di luna cu Minister di Desaroyo Teritorial, Infrastructura y Medio Ambiente a manda un comunicado di prensa den nomber di Grupo Martinón, e desaroyadonan di e hotel, como tambe grupo financiero Connected Capital y Three Rivers Real Estate, tur esakinan conecta cu e desaroyo y construccion di e hotel. Den esaki, textualmente a bisa cu ‘e hotel no lo tin ningun influencia negativo’ riba ecologia y medio ambiente di nos isla.
Dia di e groundbreaking di Secrets hotel, segun Ret Karibense, tanto Minister Otmar Oduber como Presidente di Grupo Martinón, Enrique Martinón, a declara lo contrario, reconociendo cu en berdad lo tin efectonan negativo riba ecologia y medio ambiente relaciona cu construccion di hotel na Baby Beach.
Siman pasa, reportero di Ret Karibense cu hopi esfuerso a presiona Oduber pa purba yega na un aclaracion riba e motibo cu a difundi un comunicado di prensa, for di su ministerio, cual tabata contene informacion falso.
Ademas di declara cu e no ta mira kico ta e problema, Oduber a declara na Ret Karibense: “Nos ta manda comunicadonan di partnernan di gobierno. Pero cada ken ta para responsabel kico nan ta skirbi. Mi no ta compronde bo punto.” Pues asina Oduber a purba di distancia su ministerio for di e comunicado, y consecuentemente a nenga di contesta mas pregunta di Ret Karibense.
Despues, durante evento di groundbreaking na Baby Beach, den cual tabatin presente representante di Grupo Martinón, Oduber a limita su contestanan y a termina cu e ronda di pregunta rapidamente. Ademas, segun Ret Karibense, vocero di Oduber, Michael Carty a preveni e reportero di entrevista e representantenan di Grupo Martinón, asina evitando cu por a ricibi un contesta riba e asunto of un aclaracion pa cu e informacion incorecto.
Na final, e reportero a logra haya Enrique Martinón pa contesta pregunta riba e impacto ambiental di e construccion di un hotel na Baby Beach, unda cu, maske el a reconoce cu no ta berdad cu no tin ningun impacto, el a bisa cu e efectonan ‘ta minimal’. El a referi na un rapport di un compania local – cual su nomber el a bisa di no por recorda na momento di contesta e pregunta – pa haya sa kico tur e efectonan riba nos ecologia y medio ambiente lo ta cu e construccion di e hotel aki. Sinembargo, el a bisa cu no sa si e tin permiso di gobierno pa comparti e rapport en cuestion.
Tampoco el a contesta tocante e comunicado di prensa cu informacion falso.
Manera Ret Karibense ta reporta, te na e momento aki, ni e gruponan involucra cu desaroyo y construccion di hotel Secrets, ni tampoco e Ministerio di Medio Ambiente, a retracta e comunicado cu informacion falso, desmenti e informacion ni tampoco manda un comentario tocante e suceso aki. Ademas, por scucha un silencio rotundo pa cu e articulo di Ret Karibense.
E comunicado cu informacion incorecto, den su totalidad, ta disponibel riba pagina di internet di e portal Ret Karibense.
Ademas, Bon Dia Aruba a reporta riba un draft di un supuesto reporte ambiental relaciona cu construccion di un hotel di 900 camber den area di Sero Colorado. Esaki ta accesibel via https://www.bondia.com/resumen-di-evaluacion-impacto-ambiental-di-baby-beach-resorts/
