Nos ta yegando na final di un otro aña un biaha mas y esey ta trece cune e bendemento di klapchi. Ayera 27 di december a cuminsa oficialmente cu benta di klapchi y e aña aki un biaha mas Korps Politie Aruba (KPA) hunto cu DTI, Brandweer, DOW y DVG lo bay haci e controlnan necesario na e establecimentonan cu lo bende klapchi.

Den un video publica pa KPA, vocero di cuerpo policial Sra. Liliana Rasmijn ta splice tur e regla- y rekisitonan necesario cu e bendedonan di klapchi mester cumpli cune durante e temporada di klapchi.

Rasmijn ta splica den e video cu e dianan cu mag di bende di klapchi ta 27 di december te cu 31 di december. Durante e dianan aki lo tin e controlnan pa cu esaki tambe. E benta di klapchi por cuminsa for di ora solo sali te cu 9or di anochi.

El a remarca cu si polis pasa despues di e orario stipula y wak cu e luga ta habri, e doño di establecimento lo haya un aviso (warning) y si cuerpo policial pasa un biaha mas y e establecimento aki no ta respetando e reglanan, lo kita e permiso di benta di klapchi di biaha.

Rasmijn a recorda tambe cu ta prohibi pa cualkier establecimento bende mucha bao di 12 aña klapchi si nan no ta compaña cu un adulto. El a agrega tambe cu esnan trahando den e container bendiendo klapchi mester tin 16 aña di edad of mas.

E bendedonan di klapchi tin cierto reglanan cu ta importante pa tene dje. Rasmijn a enfatisa tur esnan cu a haya nan permiso pa benta di klapchi mester zorg cu tin e aparato pa paga candela, cual ta un rekisito di DTI y brandweer. Nan mester zorg cu tin un EHBO kit den nan establecimento den caso cu algo mester pasa y nan mester zorg pa e container ta semper limpi.

El a resalta cu ta absolutamente prohibi pa bende klapchi bieu. El a splica cu e controlnan ta bay ta basa riba e benta di klapchi di e aña prome, esta 2021, y e aña aki. Esey ta e fechanan cu mag di tin ariba e productonan di klapchi cu ta wordo bendi.

Rasmijn a subraya tambe cu e instancianan encarga cu control por pasa controla e luga un biaha, pero pa e siguiente dia nan por pasa atrobe. “No ta pasobra e departamentonan a controla e prome dia, esey no kiermen cu e controlnan no ta sigui na mesun luga. Nos por aparece back. Tambe si bo a haya un aviso, nos lo bin back pa asina wak si tur cos a wordo drecha manera cu mester ta,” el a agrega.

Pa ciudadanonan tambe ta importante pa nan ta na altura di algun tips na momento di cumpra y tira klapchi. Sea critico riba e klapchi cu ta cumpra. Klapchi no mag di ta mas cu 2 aña bieu. Controla e fecha riba dje. Controla e klapchi tambe riba su daño. Klapchinan cu tin daño, no ta bay haci loke ta spera di haci, cu consecuencia cu esaki por lastima un persona.

Sa kico klapchi ta haci. Wak si e tin un etiketa cu ta prescribi kico e ta haci of si e tin un mensahe pa ilustra kico e ta bay haci. Si esaki no tey, puntra e persona cu ta bende klapchi kico e ta haci, pa asina sa kico por spera di e klapchi y wak si e ta peligroso of no.

Ta hopi importante pa cumpra klapchinan adecuado pa mucha. For di chikito ta un tradicion cu ta tira klapchi. Nos muchanan ta lanta den esfera di tira klapchi, pero tin cu educa nan na un manera corecto, con pa cende esaki sigur.

Mester educa e hobennan y papia cu nan ariba e peligernan di klapchi. Hopi biaha nan ta gusta experimenta cu klapchi. Nan ta traha bom, of guera riba otro. Mester educa nan con pa tira klapchi na un manera sigur pa nan y esnan rond di nan.

Usa mecha semper, preferiblemente mecha largo. No cende klapchi cu sigaria, lighter of cualkier otro obheto.

Hopi importante, si un klapchi no cende of no traha ora cu e wordo cendi, no bolbe back pa cende klapchi. Tin diferente velocidad, tin ta cende hopi mas lihe cu otro y si a cende un klapchi y esaki no a haci nada, laga algun minuut pasa (minimo 30 minuut) pa ta sigur cu esaki a paga.

Nunca cende klapchi den man esaki por hiba na accidentenan hopi grave caminda por perde dede, man of hasta wowo. P’esey mester cende tur tipo klapchi riba tera.

Y por ultimo, pero hopi importante, nunca tira riba otro hende, riba bestia of riba auto.