Musica ta un forma di arte cu ta existi desde inicio di humanidad. E ta un di e formanan di expresion artistico mas importante y ta crea movementonan cultural y social cu ta influencia comunidadnan den formanan impactante.
Aunke ainda ta existi e tipo di musica clasico, di antes, e arte musical a evoluciona tanto cu awendia e debate ariba e musica actual, specialmente e genero urbano, ta grandi y opinionnan ta varia fuertemente.
Musica ta influi di manera importante den e bida y cultura di un persona, pero e tin un impacto mas fuerte den e bida di un hoben. E ta un elemento fundamental den e formacion, emocion y custumbernan di e bida di un hoben. Danki na e diversidad den estilonan di musica, cada hoben por defini nan identidad.
Otro factornan di musica cu tambe ta yuda un hoben defini su identidad ta e style di bisti, e style peña y papia. Por ehempel, hobennan rocker tin un estilo specifico di bisti, peña, papia y hasta pinta cara cu ta unico na e genero di rock.
Artistanan urbano manera Bad Bunny, J-Balvin, Anuel, Maluma, entre otro, ta domina e industria musical den actualidad y e tipo di musica cu e artistanan urbano ta canta ta contene cada biaha mas mensahenan di violencia y sexualidad. E tipo di mensahenan aki, cu hobennan ta scucha diariamente, ta difundi ideanan y maneranan di pensa cu por yega na normalisa actonan violento.
Algun efectonan negativo cu musica por causa den hobennan ta debilidad sentimental y afectivo, depresion, ideanan suicida, rebeldia y algun generonan di musica cu a traves di estudionan a ta wordo vincula na incitacion na e consumo di substancianan ilegal.
Manera menciona, e genero urbano, cu ta uno hopi popular entre hobennan y ta relaciona tambe cu deterioro di lenguahe di hobennan, ya cu hopi biaha e artistanan ta usa hopi palabranan malo y tin ademas mal pronunciacion na momento di canta. Tambe, un tendencia cu ta generalisa cada biaha mas ta e degradacion di e ser femenino y su rol den sociedad.
Ta bon pa recorda e polemica cu a rondona e cantante J-Balvin y su cancion titula “Perra” y e videoclip di esaki. Algun dia despues di su lansamento, figuranan publico, incluyendo e vice-presidente di Colombia, Martha Lucia Ramirez, a cualifica e cancion manera machista, sexista y hasta racista cu ta atenta contra e derechonan di hende muhe.
Den e videoclip por a mira con hende muhenan tabata interpreta cachonan cu tabata lastra ariba caya y tabata mara na cadena cu un hende homber tabata hiba den su man. Despues di e gran polemica y e feedback negativo, e cantante a haya su mes obliga di baha su cancion y videoclip for di YouTube y ofrece un disculpa publico.
Mester remarca, cu e tendencia aki, por wordo vincula na e aumento di violencia contra hende muhe. Hobennan cu ta scucha e tipo di mensahenan aki frecuentemente ta crece pensando cu esey ta normalidad, cu un hende muhe ta un ser debil cu no merece respet. Esaki nan ta demostra na su luga back den cualkier relacion cu nan por tin cu un hende muhe, agrediendo, degradando y faltando respet na e ser femenino den nan bida.
Violencia ta un consecuencia tambe cu ta nace di scucha e tipo di musica aki, Estudionan realisa a determina cu tin un vinculo entre hobennan “ghetto” cu ta pertenece na gangnan violento y e genero di musica urbano, specificamente e genero rap. Den e caso aki no ta solamente musica ta influencia e hobennan cu ta scucha e genero aki specificamente pa uni na un gangnan of desaroya actitudnan violento.
Nos por mira e tendencia aki den peliculanan tambe caminda ta demostra cu e tipo di musica aki specificamente ta vincula na e tipo di actividad aki y di e forma aki ta reforsa, y den algun caso presiona, e pensamento di e hoben pa sigui e tendencia den bida real y uni na un gang y realisa actonan violento.
A pesar cu musica di actualidad ta influencia hobennan di manera negativo, di otro banda tin e musica cu ta positivo y ta contene mensahenan positivo. Musica clasico musica gospel ta generonan cu ta transmiti mensahenan cu balornan y positivismo.
Tin algun genero di musica cu ta yuda hobennan gana mas confiansa, pa sali for di nan bubble y enfrenta mundo cu seguridad den nan mes.
Na final, si cancionnan ta trata di bida mes y nos kier un pais mas sigur, no ta importante scucha musica cu ta hiba na cosnan positivo?
