Tourism Corporation Bonaire (TCB) den colaboracion cu Diamond PR Agency a ricibi Palina Kozyrava, kende ta un di e “Lifestyle & Travel” “blogger” mas exitoso y Instagram “Influencer” aleman, na Boneiro.
Recientemente, e “blog” di Palina a sali den e tòp 15 “blogs” mas importante di Alemania, di e revista aleman di economia “Wirtschaftswoche”. E “blog” di Palina ta consisti di temanan manera biahe, beyesa, bida, moda y mas. E contenido di biahe ta exclusivo y luhoso, pero tambe e ta contene destinacionnan bunita, autentico y cu no ta wordo mira frecuentemente. Tambe Palina tin mas cu 250 mil siguido riba Instagram. Palina a biaha pa Boneiro hunto cu su pareha y manager Maximilian Schiefer. Palina y Maximilian a keda na un di e vilanan na El Pueblo y na Courtyard by Marriott Bonaire. Durante di nan estadia, nan a explora algun di e cuebanan na Boneiro, nan a experencia land sailing” y nan a snorkel na varios sitio. Palina y Maximilian a namora di Boneiro asina tanto cu nan a dicidi di extende nan estadia te cu fin di februari. Pa lesa y mira tocante di Palina su estadia na Boneiro, por bishita e siguiente website y pagina social: http://www.palinakozyrava.com/travel http://www.instagram.com/palinakozyrava Na comienso di februari, TCB den colaboracion cu Diamond PR Agency tambe a ricibi Sonja Fröhlich di e revista Focus Magazin, cual ta un di e tres (3) revistanan di mas grandi na Alemania. Durante di su estadia na Boneiro, Sonja a keda na One Ocean Apartment y na
Djambo Apartments, y a traha riba proyectonan cu su coleganan na Alemania via internet. Sonja a skirbi y a publica un articulo di cuater (4) pagina tocante di “workation in Bonaire”, inclui imagennan di Boneiro den e revista aleman Focus Magazin. Durante di su bishita na Boneiro, Sonja a bishita diferente arianan caminda estudionan ecologico ta tuma luga y tambe a tene un entrevista cu Caren Eckrich, kende ta e lider di biologia na STINAPA. Tambe Sonja a bishita Cadushy Distillery y a purba e Chef’s Table na La Cantina. Den futuro binidero, lo publica un di dos articulo di Boneiro cu e enfoke riba vacacion na Boneiru.
