(AP) – 1 di 4 muhe demandando e influencer Andrew Tate pa agresion sexual a bisa cu el a dal e cu un faha y a pone un arma di candela den su cara, segun documentonan di corte cu a keda entrega na Londres.
E acusacionnan a keda entrega ana pasa pero a bini dilanti diahuebs, algun dia prome cu e prome audiencia den e caso civil proximo siman den corte di nivel halto. Tate, di 38 aña, no lo ta presente mirando cu su persona y su ruman homber Tristan Tate ta enfrenta acusacionnan di trafico humano y forma un gang criminal pa sexualmente explota hende muhe na Romania.
E muhe acusando cu Tate a pone un arma di candela den su cara a bisa cu e ex kickboxer a bis’e “bo ta bay haci loke mi bisa of bo ta paga” ora cu el a haci esaki. E no a keda cla si e arma tabata real of un replica. Tambe el a bisa cu Tate a dal e cu un faha y tabata haci esaki ora cu e no tabata baha for di cama y haci trabao pa su negoshi di webcam.
Dos di e muhenan involucra den e demanda civil tabata traha pa Tate su negoshi di webcam, y dos ta ex pareha di e influencer. Nan identidad no a keda revela di acuerdo cu e practica legal na Inglatera. E incidentenan ta acusa di a tuma luga entre 2013 y 2015.
Vocero di Tate, ken tin miyones di siguido online – varios di nan mucha homber hoben atrai pa e bida luhoso cu e ta proyecta – , a bisa cu e acusacionnan den e documento “no a keda proba” y ta “categoricamente” nenga.
“Specificamente, e ta nenga cu el a yega menasa un hende cu arma di candela, a haci actonan sin consentimento y a somete cualkier individuo na daño fisico of psicologico,” segun respuesta entrega pa su abogadonan.
Reino Uni su Crown Prosecution Service a dicidi di no persigui Tate pa acusacionnan di agresion sexual den 2019. 3 di e victimanan den e demanda actual tabata suheto di investigacion di polis cu e fiscalnan a scoge di no persigui.
E rumannan, kende ta ambos ciudadano Britanico y di Merca, a keda deteni na Romania den fin di 2022 y a keda acusa formalmente aña pasa bao cargo cu nan a participa den un organisacion criminal cu a atrae hende muhe pa Romania, unda supuestamente a explota nan sexualmente. Andrew Tate tambe a keda acusa di violacion. Nan ta nenga tur e acusacionnan den nan contra.
Nan ta enfrenta extradicion pa Reino Uni despues cu nan proceso na Romania caba, despues cu Inglatera su Bedfordshire Police a haya un ordo di detencion Europeo pa acusacionnan separa di violacion y trafico humano cu ta involucra diferente hende muhe entre 2012 y 2015.
Luna pasa, Andrew Tate su ex pareha, Brianna Stern a entrega un demanda den su contra na Los Angeles unda el a acusa su persona di agresion y agresion sexual. Tate ta nenga e acusacionnan aki.
