Diasabra 5 di augustus a tuma luga e coronacion di e reina di Infinity Carnival Group pa Carnaval 70. Jaylienne Tromp a keda corona como Reina Hubenil di Infinity Carnival Group 2024 y Esther Tromp ta Sra. Carnaval Infinity Carnival Group 2024.
Den un ambiente carnavalesco y cu hopi entusiasmo, Infinity Carnival Group a corona su reina hubenil y Sra. Carnaval pa Carnaval 70.
Reina Hubenil Noord Infinity Carnival Group ta den persona di e hobencita Jaylienne Tromp di 13 aña di edad, e ta bishita Maria College Mavo y su preparacion ta andando caba.
“Mi ta super contento cu mi a wordo corona como reina hubenil di Noord Infinity Carnival Group. Mi ta den preparacion, mi tin un team mi tras, mi tin mi mama y mi tata y full mi famia cu ta sostene mi,” Jaylienne a bisa na Bon Dia Aruba.
El a remarca cu su preparacion y ekipo ta un secreto y su preparacion ta andando caba pa eleccion di reina hubenil di Carnaval 70.
Jaylienne no ta desconoci pa loke ta trata eleccion di reina di carnaval. El a yega di participa caba pa reina infantil representando districto di Noord. El a conta cu pa e eleccion ey e tabatin solamente cuater dia di preparacion, p’esey pa e biaha aki su preparacion a cuminsa di trempan pa asina tin hopi mas tempo.
“Mi ta hopi emociona pa otro aña,” el a bisa tocante su participacion den eleccion di reina hubenil proximo aña.
