(arstechnica) – Mientras e pandemia di coronavirus ta devasta India, dokternan ta reportando un aumento perturbante di casonan di un infeccion raro, potencialmente fatal cu schimmel entre hende cu a recupera of ta recuperando di Covid-19.
E infeccion yama mucormycosis, of algun biaha ‘schimmel preto’ den reportahenan den medionan di comunicacion, y ta parce di ta atacando pashent di Covid-19 a traves di nanishi y sinus, unda e por agresivamente plama na wesonan di cara, wowo y hasta cerebro (rhinocerebral mucormycosis). Den otro casonan, e schimmel tambe por ataca pulmon, irita cuero y sistema gastrointestinal, of plama den e curpa den fluho di sanger.
Un caracteristica clasico di mucormycosis ta necrosis di tehido – morto di tehido, esencialmente – cu den forma rhinocerebral por conduci na lesionnan preto, descolorido riba cara, particularmente riba nanishi y shelo di boca. Mucormycosis ta fatal den alrededor di 50 porciento di casonan.
Si e schimmel logra yega den wowo, pashent por desaroya vision ‘blurry’, hinchamento y perdida di bista. Pashentnan hasta por tin necesidad di cirugia pa kita nan wowo pa preveni cu e infeccion ta continua plama, segun dokternan cu a papia cu BBC.
Dr. Akshay Nair, un ciruhano di wowo basa na Mumbai, a bisa BBC cu el a trata 40 pashent cu mucormycosis na april. Diesun di nan tabatin mester di cirugia pa kita un wowo.
E cantidad total di caso di mucormycosis na India no ta cla, pero reportenan den medionan di comunicacion a pone e cantidad den centenares di caso. Dr. Renuka Bradoo, cabesante di unidad di horea, nanishi y garganta di Sion Hospital na Mumbai, a bisa BBC cu dokternan a mira al menos 24 caso di mucormycosis den ultimo dos luna. Usualmente nan ta mira apenas seis caso den henter un aña.
Pio pa diabetico
Un reporte den The New York Times for di New Dehli a reporta cu medionan noticiero local den estado occidental di Maharashtra, cu ta inclui Mumbai, a registra alrededor di 200 caso. Den estado occidental di Gujarat, oficialnan estatal a bestel 5mil dosis di amphotericin B, un medicina antifungal usa pa trata mucormycosis.
E asombroso aumento di caso por tin su splicacion den e cantidad halto di hende cu diabetes na India, compaña pa mal higiena y e aumento critico di Covid-19, dokternan ta specula. Mucormycosis ta conoci pa afecta hende cu tin sistema immuun comprometi, specialmente hende cu diabetes – y esnan cu diabetes mal controla en particular.
Diabetes no solamente ta afecta respuesta immuun, ricibiendo schimmel invasivo, sino tambe ta provee un ambiente comodo pa infeccion. Mucormycosis ta causa pa mucormycete, un grupo di schimmel cu ta biba den tera y materia organico den descomposicion, manera palo, blachi mata y compost. E schimmel aki ta stima ambientenan acidico rico den hero, y ketoacidosis diabetico – un complicacion di diabetes cu ta pone sanger bira acidico – ta un factor di riesgo clave pa desaroya mucormycosis. Un revision di literatura publica den New England Journal of Medicine na 1999 a calcula cu alrededor di 50 porciento di tur caso di mucormycosis rhinocerebral ta tuma luga den hende cu diabetes.
India no tin tasanan excepcionalmente halto di diabetes compara cu otro pais. Pero pa motibo di su poblacion di mas di 1.36 biyon persona, e pais tin un di e totalnan mas halto di diabetes na mundo, calcula na alrededor di 77 miyon persona, tras solamente di China. India tambe tin un di e nivelnan mas halto di morto y discapacidad pa diabetes, segun un estudio publica den e journal Scientific Reports aña pasa.
Enter your email to get the Ars Technica newsletter
Top of Form
Bottom of Form
“Triple whammy”
Agregando na e problema aki ta e crisis actual di Covid-19 afectando sistema di cuido di salud na India. Cu hospitalnan abruma, expertonan cu a papia cu e Times a nota cu hopi pashent di Covid-19 ta ricibi tratamento di oxigeno na cas sin higiena adecua. Es mas, cantidad di pashent di Covid-19 ta ricibi steroidenan poderoso – cu ta debilita sistema immuun mas ainda.
“Bo tin un nivel halto di mucormycosis, bo tin hopi steroid – talbes demasiado – siendo usa, y bo tin diabetes, cu no ta siendo controla of maneha”, segun David Denning, experto den infeccion di schimmel na Universidad di Manchester, a bisa AP. “E ta un triple whammy”, el a bisa.
