(NLTimes) – E sucursal na Amsterdam di e asociacion di hospitalidad KHN a uni e protesta contra e capital Hulandes su plan di cera algun di e sitionan erotico na Rosse Buurt (Red Light District) y habri un centro erotico. Negociantenan den catering den e area aki ta hopi preocupa cu e plan aki, segun e asociacion a expresa na De Telegraaf.
“Tur hende ta realisa cu esaki no ta e solucion,” KHN su vocero regional a conta e corant. “Nos no ta kere cu e luganan erotico aki so ta crea e grupo di hende. Tin hopi mas pa mira aki. E ta un area compacto cu ta sumamente atractivo pa turistanan. “
Segun KHN, tur e medidanan cu Amsterdam a tuma recientemente ta enfoca hopi mas riba e municipalidad su imagen na luga di berdaderamente atende e problemanan. E vocero a referi na e prohibicion di huma marihuana riba caya den e area y orarionan di cera mas trempan pa e luganan erotico y establecimentonan di catering den e area. “Cada pasa un par di luna, tin restriccionnan nobo, cual no ta disminui e cantidad di criminal den e area.”
E ciudad kier habri un centro erotico y move mayoria trahado sexual fuera di Red Light District como parti di un esfeurso pa reduci e presion den e areanan mas pobla. Alcalde Femke Halsema anteriormente a bisa cu un “cantidad substancial” di sitionan erotico lo cera. E kier pa e centro erotico bira un “alternativa atractivo” pa Red Light District segun AT5.
