(AFP) – 5 aña despues di un prome ola di scandal di acoso cu a sacudi e mundo di gaming, hopi hende muhe trahando den e industria a conta AFP cu nan a mira of experiencia sexismo den espacio laboral, cu e preocupacion cu dificultad financiero den e sector lo resulta den deterioro di e progreso.
“Mi a experiencia circunstancianan di acoso, circunstancianan di falta di respet, menosprecio y a te hasta completamente ignora mi,” Elaine Gomez di 34 aña a comenta. Elaine ta un desaroyador freelance na New Jersey.
Nombernan grandi den gaming manera Francia su Ubisoft (creador di e saga menciona Assasin’s Creed) of Merca su Blizzard (creador di Call of Duty) a mira hende muhe ta bini dilanti pa expone comportamento sexista den espacio laboral den añanan recien.
3 ex ehecutivo di Ubisoft lo enfrenta huicio na Francia a causa di acusacionnan di acoso den juni. Ya caba a despedi 2 di nan a causa di mal conducta serio, mientras cu e ex number 2 di e compania, ex director creativo Serge Hascoet a renuncia.
Ubisoft a conta AFP cu el a “cambia su organisacion di HR y proceso pa maneha mal conducta.” Entre e cambionan aki tabatin “Crea un ekipo di relacionnan di empleado specialisa cu ta dedica na yuda preveni y resolve incidentenan.”
Activision Blizzard no a responde na AFP su preguntanan tocante medidanan contra acoso.
“Pa tur tipo di comportamento sexista, te ainda tin trabao pa haci den prevencion y aumenta conscientisacion,” un specialisa di acoso na un studio Frances grandi a comenta. E persona aki a pidi keda anonimo. E specialista aki a conta cu el a mira empleadonan reporta na su persona “4 pa 5 biaha” den un aña, tur di nan tocante incidentenan sexista. Sinembargo esaki ta representa “e punta di e cero,” segun su opinion.
Varios hende muhe no ta tribi di papia den un industria cual su dominancia ta grandemente den man di hende homber. Aunke hende muhe ta responsabel pa mas o menos mita di tur gamer rond di mundo segun cifranan di 2023, segun specialistanan den data di gaming Newzoo, nan ta solamente un kwart di empleadonan den studio segun e colectivo Women in Games.
Desaroyo di wega actualmente tin mas di 110,000 persona emplea na Europa, 105.000 persona na Merca y 35.000 na Canada, segun European Games Developer Federacion (EGDF), US Entertainment Software Association (ESA) y Canada su cuerpo di e mercado.
“Cos a bira hopi miho,” Morgane Falaize, ken ta hefe di Women in Games su capitulo Frances a comenta. El a señala cu e crecemento pa hende muhe ta di apenas 15% den 2018 pa 24% den 2023 na e pais. E cifranan en general no ta tapa e falta di balans den otro departamentonan, cu hende muhe cargando cerca di mita di posicion den marketing y comunicacion pero menos di 10% den trabaonan asina yama “tecnico” manera diseño y coding.
Entre managernan, e proporcion di hende muhe tabata apenas 20% den 2022.
“E no ta cu nos no kier hende muhe, e hecho ta cu no tin candidato femenino” pa rolnan halto, Marianne Barousse, ken ta opera un ekipo di 200 hende na Gameloft di Montreal a comenta.
“Ami mes tabata victima di sexismo for di un empleado cu tabatin dificultad tuma ordo for di hende muhe,” Emma Delage di 35 aña a comenta. E ta hefe di studio di wega independiente Camelia na Montpelier.
Delage a agrega cu awo e ta impone “cero tolerancia” pa sexismo.
E ta corda ora cu e tabata compara na un prostituta ora cu el a solicita posibel inversionista pa un wega binidero – un comparacion cu e “no ta kere cu hende homber cu a recauda fondo mester a enfrenta.” Den e mesun reunionnan aki, “nos ta tuma menos na serio compara cu hende homber,” Marie Marquet, co-fundador di studio Frances Splashteam, cu frecuentemente a mira cu posibel sostenedornan of partnernan tabata mas comfortabel ora di papia cu su partner di negoshi masculino den reunionnan.
“Inversionistanan ta duda si pone placa den negoshi cu ta maneha pa hende muhe,” Tanya X a comenta. E ta un hefe di studio independiente Kitfox Games, basa na Montreal. E ciudad Canades ta un punto pa desaroyo di weganan, y esaki tambe tabata na centro di e scandal cu a golpia Ubisoft den 2020.
Empleadonan na e studio na Montreal di e grupo Frances a bisa cu nan a wanta un “clima di teror” cu a surgi for di comportamento y discriminacion sexista. “Tin hende den e industria cu ta haya problema pa ahusta, bo por sintie,” Marie Marquet a comenta. Sinembargo, e ta mira speransa den “generacionnan nobo” binidero den desaroyo di wega.
Pero e euforia di crecemento causa pa e lockdown di coronavirus a habri caminda pa un crisis economico cu por bay cu algun di e avancenan cu a logra den ultimo añanan pa loke ta trata sexismo den e industria di videogames.
“Practicamente no tin trabao promovi mas,” un muhe trahando na un studio di Paris a comenta, pidiendo pa keda anonimo. “Si mi papia hopi, cos ta bay fout.”
Mientras e industria ta pasa door di temponan dificil, “hende muhe ta demasiado representa den trabao cu ta na nivel mas abao di e herarkia” y pa e motibo aki hopi biaha ta prome den bay ora compania mester recorta trabao. E tipo di accionnan aki na companianan grandi por nifica tambe menos recurso pa esfuersonan di diversidad.
Desaroyo di videogames ta un “mundo chikito” unda papia of denuncia algo por derota un reputacion, Falaize di Women in Games a comenta. “Ya caba mi a tende ‘tene cuidou cu kico bo ta haci, paso mi por pone bo den blacklist,;” Marquet a conta. “Mayoria hende muhe no kier causa problema” den e industria di videogames, otro desaroyador independiente a papia bao condicion di keda anonimo. “E ta un tipo di instinto di sobrevivencia pa nos,” el a agrega.
El a bisa cu el a scoge di no tuma accion legal a causa di “idioma ofensivo” y un sunchi sin consentimento mientras e tabata trahando na un studio Frances grandi. “Mi ta hasta pensando renuncia na videogames pa haya miho condicion laboral otro caminda,” e desaroyador a expresa.
Potret ilustrativo.
