Recientemente Gobierno di Aruba a anuncia cu e variante Omicron a drenta Aruba oficialmente. No a pone medidanan drastico ainda, pero ayera mirando e aumento drastico den casonan positivo Gobierno di Aruba hunto cu Crisis Team a anuncia cu tur fiesta di fin di aña ta keda cancela y a implementa medidanan mas estricto pa biaheronan cu ta yega Aruba.

E entrada di Omicron a ocasiona hopi reaccion den comunidad y e medidanan nobo cu a keda anuncia ta reforsa e miedo cu hopi tin cu mas medida lo bin na vigor durante dianan di fiesta. Un di e sectornan cu mas a wordo afecta durante e ultimo ola di Covid y e variante Delta tabata e industria di musica y entretenimento. Sr. Ofo Escudero di Aruba Entertainment 2020 a conta e portal di noticia 24ora cu e situacion ta preocupante pa loke ta trata e futuro di e sector di musica.

“En berdad e ta sumamente preocupante, manera tur hende sa, mirando cu unabes cu bo ta scucha speculacionnan, unabes cu bo ta wak cu ta bay tin ahuste den e medidanan, anto nos conoce caba cu como e industria aki di farandula, di entretenimento, hopi biaha cerca nos ta toca atrobe”, el a bisa.

Pa e momentonan aki, segun Sr. Escudero, nan tin cu warda pa wak ta kico lo bay pasa. El a splica cu esaki no ta un situacion cu nan por culpa ningun hende, pero di otro banda e biaha aki, el a indica, cu e situacion ta bin cu un sabor extra amargo pasobra nan sa kico a pasa durante e otro variantenan y si Gobierno di Aruba y Crisis Team bin cu medidanan estricto lo ta pio pasobra aworaki no tin ningun tipo di subsidio y no tin fase.

“Esey ta trece un sabor un tiki amargo y preocupante pa locual cu ta spera nos y pa con hopi e ta spera nos atrobe si ta e caso cu nan haci esey. Aworaki nos a cuminsa move un tiki mas o menos, nos a cuminsa pone pan ariba mesa pa famia, atrobe nos ta haya nos mes cu e situacion aki”, el a indica na e portal.

Escudero a enfatisa cu e ta spera cu Gobierno di Aruba por pensa cu esaki ta un industria di trahadonan y el a remarca un biaha mas cu aunke en berdad nan ta haci musica, nan ta biba di entretenimento y cu e trabou cu nan ta haci ta mescos cu cualkier otro trabou. “Nos ta compronde cu nada ta riba bida di hende, pero di otro banda nos kier pa boso compronde cu esaki ta locual ta trece e pan na cas. Mi ta kere hopi di nos den e industria aki ta preocupa pa locual nos ta scuchando tur e dianan aki cu kico lo pasa, cu nan a cuminsa medio prepara bo pa e gran noticia y ban spera cu no ta asina” el a agrega.

E industria di musica no ta solamente entretenimento y pa hopi, Escudero ta subraya, esey ta nan trabou primario, ta locual nan ta bida di dje y aworaki atrobe e situacion ta bayendo den un caminda cu nan a biba caba y manera el a indica, “e ta hopi duro”. El a sigui menciona cu segun speculacionnan y mirando con Crisis Team a handle e ultimo temponan aki, e prome sector cu nan ta ataca ta e sector di entretenimento.

“Atrobe locual nos kier trece dilanti ta cu nan mester corda cu e biaha aki nos no tin ni Fase, cu Fase mes, aunke e no tabata mucho cos, e tabata algo. Aworaki no tin esey, dus aworaki ta con nos lo bay sobrevivi, dependiendo di con e Omicron aki ta bay planta su mes den comunidad”, Escudero a bisa e portal.

El a splica cu te cu na e momentonan aki e industria di musiconan no a cuminsa sinta cu Crisis Team y Bureau Rampenbestrijding Aruba. Segun el a elabora cu e motibo mas cardinal pakico nan tabata negosha y reuni cu Crisis Team y Rampenbestrijding, tabata pasobra nan kier traha y mayoria di e musiconan cuminsa back na trabou y a cuminsa lanta cabes, aunke nada compara cu con e situacion tabata antes, el a remarca. Pero pa aworaki nan bay back na cero, esey ta sumamente preocupante pa tur e miembronan, pa tur e coleganan cu ta biba completamente di esaki.

“Mi ta kere aki na Aruba nos mandatarionan mester por sa e dolor cu nos a pasa den tur e variantenan aki y mi ta kere aworaki nos por tin esey como ehemplo y no trece mas dolor den e pueblo. Mi ta kere cu kico nos por haci, kico cu nos por ahusta, pero e ta suplica cu manda nos cas y sin trabou no ta un opcion”, el a finalisa.

Srta. Jessy Alvarado, cantante na un hotel popular aki na Aruba tambe ta di opinion cu na momento cu medidanan mas estricto wordo introduci, e industria di entretenimento ta esun cu ta sufri mas. “Mi ta pensa cu si nan bolbe cu e medidanan nan ta bay perhudica e musiconan directamente, pasobra durante e crisis anterior nos tabata esunnan cu a keda sin trabou prome y nos no tabatin con pa paga nos debenan”, el a bisa.

“Realmente esnan mas perhudica ta e musiconan. Nos ta canta riba un scenario y nos no ta den contact direct cu niun hende y e lo ta hopi inhusto cu e uniconan cu mester paga pa e circunstancianan aki ta e musiconan ora cu realmente tur cos lo sigui funciona normal. Nos ta biba di esaki, nos ta biba di cada presentacion. Ora cu nos no bay canta na un presentacion nos no ta cobra y si nos no cobra nos no tin con pa paga nos compromisonan of con pa paga nos debenan na final di luna. E ta hopi inhusto den mi opinion”.