E saldo mortal preliminar di e tsunami cu a dal playanan turistico y areanan costal rond di e Estrecho di Sunda na Indonesia, ta ser calcula na 222, pero ta anticipa cu esaki lo aumenta, segun autoridadnan.
Funcionarionan a confirma 222 persona morto y 843 herida, despues cu olanan grandi causa pa un erupcion volcanico, a yega na e costanan di e islanan Java y Sumatra pa mas o menos 9.30 pm ora local (2.30pm GMT) di diasabra pasa.
Agencia di maneho di desastre di Indonesia a bisa cu 28 persona ainda ta perdi y cu rescatistanan mester yega ainda na tur e areanan afecta. E parti mas afecta ta e area di Pandeglang di provincia Banten na Java, e agencia a bisa.
Ta supone cu e tsunami a ser causa pa movemento di tera bao superficie di lama, causa pa un erupcion di e volcan Anak Krakatau. No tabatin movemento sismico significante cu por a adverti pa un tsunami.
Anak Krakatau, cu ta situa entre Java y Sumatra, tabata saca sihinishi y lava pa lunanan largo caba. E isla volcan, di cual e nomber ta significa ‘yiu di Krakatau’ , ta un di 127 volcannan activo den e archipelago Indones.
El a surgi di den oceano despues di un erupcion grandi cerca di Krakatau na 1883. E erupcion ey, posiblemente un di e erupcionnan volcanico mas fuerte di historia, a cobra mas di 36.000 bida.
