Wardacosta ta sigui traha incansablemente pa asina mantene e costanan tanto di Aruba como di otro islanan sigur. Na mesun momento personanan indocumenta ta sigui pone nan bida den peliger purbando drenta Aruba cu boto di manera ilegal, y tin biaha, lamentablemente nan ta perde nan bida.

No ta un secreto cu Venezolanonan ta continua den e lucha pa por tin un miho calidad di bida. Pa e motibo aki mas di 7 miyon di persona a dicidi di bandona Venezuela y bay biba na otro pais pa por ofrece miho condicion na nan famia. Den esaki, Aruba no ta un excepcion mirando cu ta un isla hopi cerca di estado Falcon. Maske e yegamento cu boto y tur loke e biahe aki ta implica pa drenta di manera ilegal ta sigui keda un peliger latente, tanto pa esnan cu ta core riesgo di perde nan bida of di bira victima di mensenhandel of mensensmokkel, como pa habitantenan di Aruba, ya cu den cierto caso via e forma aki, arma cu droga ta drenta nos isla.

Ayera mainta Wardacosta a notifica a traves di un comunicado di prensa cu nan haya un notificacion di Cuerpo Policial Aruba cu personanan indocumenta a logra subi tera den area di Vader Piet. E dos persona cu a duna e declaracion na un persona local, a indica cu nan a bini cu un lancha, pero esaki lo mester a bolter riba lama.

Mesora Wardacosta a saca unidad di tera pa bay tira un bista den e area. Na yegada na e area panort di Aruba, e agentenan di Wardacosta a detecta dos curpa sin bida den lama.

Cuerpo Policial di Aruba a dirigi nan helicopter y Wardacosta a dirigi su patruyanan di tera pa sigui cu e buskeda pa mira si tabata encontra mas persona. Durante e buskeda andando a encontra un curpa mas sin bida. Autoridadnan a señala cu e caso aki tabata den desaroyo, pero nan no a ofrece mas detaye di e caso aki.

Redactor di Bon Dia Aruba a tuma contacto cu nan pa haya sa mas di e caso aki, debi cu segun fuentenan na estado Falcon, tin varios persona perdi cu a sali cu boto for di Paraguana caminda pa Aruba. Pero nan no por a haya mas informacion y Bon Dia Aruba tampoco.

Haciendo un recorido den aña aki

Dia 2 di november: Wardacosta y Cuerpo Policial Aruba a detene 9 persona indocumenta, na unda cu den cooperacion cu Korps Politie Aruba (KPA), Wardacosta a tuma nota di actividadnan sospechoso na altura di Sero Colorado. Patruya di ambos organisacion a activa inmediatamente pa asina investiga e caso. Tabata trata di 9 persona indocumenta (8 hende homber y 1 hende muhe) cu nacionalidad Venezolano (incluyendo e capitan) cu a yega Aruba riba un lancha. Wardacosta hunto cu KPA a detene e capitan y a entrega e otro personanan na servicio di migracion.

Dia 22 di october: Wardacosta a informa cu den transcurso di oranan di madruga, un boto sospechoso nabegando direccion di Sero Colorado, Aruba a keda detecta. Mesora a dirigi un Metal Shark pa intercepta e boto. Despues di intercepta e boto, e agentenan di Wardacosta a haya abordo 16 persona, di cual 15 hende homber di Venezuela y 1 hende muhe procedente di Colombia. A hiba e boto na e pier na Savaneta, unda a entrega e personanan na Guarda Nos Costa. E capitan y su ayudante a keda entrega na Cuerpo Policial di Aruba.

Dia 3 di October: Wardacosta y Cuerpo Policial Aruba a intercepta un lancha cu 38 indocumentado riba lama. Den esaki, Centro Operacional Maritimo di Wardacosta a tuma nota di un lancha procedente for di zuid bayendo direccion di Aruba. Inmediatamente a manda e Dash 8 pa confirma esaki y a constata cu tabatin un cantidad grandi di persona riba e boto. Na momento cu e Metal Shark a yega, a confirma cu tabatin un total di 38 adulto Venezolano indocumenta riba e boto, di cual 3 hende muhe y 35 hende homber. E helicopter di KPA (Korps Politie Aruba) a asisti durante e accion pa asina ilumina e area caminda e boto tabata. E condicion di e lancha tabata hopi malo y pa e motibo aki a pidi un Metal Shark adicional pa asina transporta tur hende di un manera responsabel. Nan a entrega tur persona na Guarda Nos Costa.

27 di september: Tambe Wardacosta y Cuerpo Policial di Aruba a intercepta un boto sospechoso den cercania di costanan di Aruba. Autoridadnan a dirigi nan unidadnan na e area di e boto sospechoso pa para esaki. Durante e accion a logra conhuntamente pa detene e boto cu 28 indocumentado abordo, di cual nan tur tabata hende homber Venezolano. E personanan a ser entrega na Guarda Nos Costa.

7 di september: Wardacosta y Cuerpo Policial Aruba den oranan di anochi a detecta un boto den cercania di e costa di Aruba cu personanan indocumenta na bordo, cual nan a purba yega tera. Mesora a dirigi e helicopter y patruya di Wardacosta na e area. Conhuntamente a logra detene 11 persona indocumenta di cual 9 Venezolano y 2 Colombiano. Dos persona di e grupo ta hende muhe. Tur e persona a ser entrega na Korps Politie Aruba KPA pa por sigui cu investigacion den e caso aki.

9 di juli: Den oranan di madruga a ser detecta riba RADAR un embarcacion sospechoso drentando awanan teritorial di Aruba biniendo for di direccion di Venezuela, Korps Politie Aruba (KPA) y Wardacosta di Caribe Hulandes, a logra intercepta e embarcacion, cu intento pa drenta Aruba di forma ilegal y a ser traslada na e base di Wardacosta na Savaneta. Abordo tabatin 15 hende homber, tur di nacionalidad Venezolano. E capitan a ser deteni y a ser entrega na e recherchenan di Unit Mensenhandel Mensensmokel pa sigui cu e investigacion. E demas personanan a ser entrega na Guarda Nos Costa.

Na juni: Segun informacion di medionan di comunicacion local ta indica cu diaranson ultimo a drenta Aruba dos boto cu persona indocumenta abordo. Kustwacht tabata basta activo y e radarnan no a detecta niun di e dos boto aki.

Den area di Sero Colorado, helicopter di Polis tambe tabata presente conhuntamente cu patruyanan, pero esey no a resulta. Polisnan a haya vestnan y e boto pega riba baranca den area di Rodgers Beach y Kustwacht a tuma e boto aki den beslag, manera e website local a informa.

Segun e reportahe di e medio aki, tabatin un otro boto cu tambe a drenta Aruba cu personanan indocumenta e mesun dia, pero no a duna mas detaye di esaki. Por a compronde cu radarnan tanto di Aruba y Corsou no a detecta esaki y autoridadnan tampoco a duna mas informacion.

Mientras tanto, 11 di October ultimo minister di Husticia y Asuntonan Social, Rocco Tjon a informa tocante un reunion cu nan a tene cu tur departamento Hudicial den cuadro di siguridad na frontera.

Durante e reunion aki, segun a indica a toca e avancenan cu tin andando pa cu e cadena hudicial, ademas a bisa cu pronto e di cuater radar lo ta yegando Aruba y alabes e Operation Command Center na Savaneta lo bira operacional na comienso di otro aña.