Mei 2023

Oficina Central di Estadistica ta presenta e resultadonan principal di e Indice di Prijs di Consumo (CPI) pa luna di Mei 2023.

Indice di Prijs di Consumo pa luna di Mei 2023

E CPI pa luna di Mei 2023 ta 106.60, loke ta representa un caida di 0.5% compara cu e indice di April 2023 (107.12). E cambio di e CPI pa e ultimo diesdos (12) lunanan (Mei 2022 te cu Mei 2023) ta 4.0%, un caida di 1.2 punto di porcentahe (ppt) compara cu e periodo corespondiente di aña pasa (5.2%). E promedio anual (ultimo 24 luna) di e tasa di inflacion pa e periodonan di Mei 2021 te cu Mei 2022 y Mei 2022 te cu Mei 2023 ta 6.1%, un subida di 3.1 ppt compara cu e 3.0% registra den e periodonan di Mei 2020 te cu Mei 2021 y Mei 2021 te cu Mei 2022.

Durante e luna aki, cuatro (4) di e diesdos (12) sectornan a registra caida di prijs. E caidanan cu tawata tin e mayor efecto riba e CPI a wordo registra pa e sectornan di “Vivienda” (-2.4%) y “Mobilario” (-2.1%), causando un efecto di respectivamente, -0.62 y -0.19 ppt. E caidanan den e restante sectornan a contribui cu un efecto di -0.07 ppt riba e CPI di Mei 2023.

E caidanan aki a wordo contraresta parcialmente door di principalmente subida den e indicenan di e sectornan di “Transporte” (1.1%) y “Comunicacion” (1.4%) cu a contribui cu un efecto di respectivamente, 0.15 y 0.10 ppt riba e CPI di Mei 2023. E subidanan den e restante sectornan a contribui cu un efecto di 0.14 ppt riba e CPI di Mei 2023.

E caida den e sector di “Vivienda” a wordo causa principalmente door di un caida di 6.5% den e categoria “Electricidad, gas y otro combustible”, causando un efecto di -0.57 ppt. E caida den e

sector di “Mobilario” a wordo causa principalmente door di un caida den e categoria “Herment y ekipo pa cas y hardin” (-14.4%), causando un efecto di -0.12 ppt. E subida den e sector di “Transporte” a wordo causa principalmente door di un subida den e categoria “Gasto relaciona cu uso di vehiculo di transporte personal” (0.9%), causando un efecto di 0.08 ppt. E subida den e sector di “Comunicacion” a wordo causa principalmente door di un subida di 28.6% den e categoria “Ekipo di telefon y fax”, causando un efecto di 0.10 ppt.

Canasta di consumo

E canasta di consumo di e CPI ta consisti di 408 bienes y servicionan. Compara cu April 2023, 45.3% di e bienes y servicionan aki a conoce un aumento di prijs causando un efecto di 0.86 ppt, mientras cu 36.3% ta mustra un caida di prijs, cu a contribui cu un efecto di -1.34 ppt y pa e restante 18.4% no tawata tin cambio den prijs. Prijsnan di bienes a baha cu 0.9% y a causa un efecto di -0.53 ppt. Prijsnan di servicionan a conoce un subida di 0.1% y a causa un efecto di 0.04 ppt riba CPI di Mei 2023.

Core inflation

E CPIC* (core inflation) – CPI excluyendo e efecto di energia y cuminda – a registra na Mei 2023 un subida di 3.2%. E indice di energia – cu ta consisti di e productonan: electricidad, awa, gasolin

y diesel a registra un subida di 16.3%. E indice di cuminda a registra un subida di 11.7%.

Kico ta CPIC?

E CPIC (core inflation) of e inflacion basico ta un porcion di e inflacion unda cierto articulonan cu tin movimientonan di prijsnan volatil ta wordo exclui, manera productonan alimenticio y energetico. Na momento cu e inflacion basico wordo calcula, e componentenan mas volatil ta wordo elimina di e inflacion total. E indice di e inflacion basico ta sirbi pa evalua e tendencia riba medio y largo plazo di e nivel general di prijsnan.

Pa ahusta maneho monetario, hopi economista ta enfoca riba e tasa di e inflacion basico, como cu esaki ta permiti un evaluacion mas profundo di e procesonan di inflacion reciente den e economia. Tur e cambionan di porcentahe di e CPIC ta wordo calcula door di compara e indice promedio di e periodo di e 12 lunanan mas reciente cu e promedio di e periodo di 12 lunanan anterior (Promedio anual).

Elaboracion di un CPI tin tres meta principal:

Como un metodo di calculo pa compensa empleadonan pa motibo di perdida di poder di compra, ahustando nan salarionan, cu e proporcion di e cambio porcentual di CPI, locual ta conoci como indexering.

Como un mecanismo pa ahusta componentenan di e producto domestico bruto (GDP) di termino nominal pa termino real den Cuentanan Nacional. (Por ehempel door di elimina e efectonan di cambionan di prijs di e balor di consumo)

Como un medio pa gobiernonan y/of banconan central fiha obhetivonan inflacionario.

Bestaansminimum

E bestaansminimum pa un hogar consistiendo di dos (2) adulto y dos (2) mucha (edad 0-15 aña) na Mei 2023 ta Afl. 5,354, un caida di Afl. 30 compara cu April 2023 (Afl. 5.384). E bestaansminimum pa un hogar di un (1) adulto ta Afl. 2,550, un caida di Afl. 14 compara cu April 2023 (Afl. 2,564).

Kico ta un “Bestaansminimum” y con e ta wordo ahusta?

CBS ta defini un bestaansminimum como e nivel minimo di entrada cu ta wordo percibi necesario pa un persona of famia por funciona den sociedad di un manera adecuado y socialmente aceptabel. Ora nos usa e definicion “Bestaansminimum”, en realidad ta wordo referi na un “Sociaal Bestaansminimum” y no na e definicion literal di un “Bestaansminimum” cu ta referi na “e suma di placa necesario pa cumpra e bienes y servicionan cu ta wordo considera necesario pa biba un bida liber di privacionnan basico” (Nacionnan Uni). Un indice a wordo crea

pa e “Bestaansminimum” door di calcula e costo di tur recursonan esencial cu un adulto promedio ta consumi durante un luna. Cada luna e indice aki ta wordo ahusta, a base di e

prijsnan di alimento, paña, vivienda, transporte y otro articulonan den e canasta.

E bestaansminimum actual ta wordo basa riba e rapport “Bestaansminimum 2010” publica door di CBS na December 2010, y cual ta wordo actualisa mensualmente segun e CPI. E unidad di referencia usa door di CBS (manera indica den e rapport aki) ta di un hogar cu ta consisti di dos adulto y dos mucha (di 0 pa 14 aña).

Bestaansminimum na Mei 2023

E bestaansminimum ta e nivel minimo di entrada cual ta wordo percibi cu ta necesario pa logra mantene un nivel di bida adecuado den un cierto pais. Usualmente e bestaansminimum ta wordo determina door di calcula e gasto di tur e recursonan esencial cu un adulto ta consumi den un luna of aña. Generalmente esaki ta wordo yama un indice basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”. Escalanan di ekivalencia ta wordo usa pa ahusta e nivel minimo di entrada percibi pa hogarnan di diferente tamaño y composicion.

E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 16+) y un peso di 0.3 pa cada mucha (edad 0-15 aña). E bestaansminimum ta basa riba cifranan di e rapport “Bestaansminimum 2010” y ta wordo actualisa mensualmente pa cu inflacion usando e CPI mensual. E unidad di referencia den e rapport aki ta di un hogar cu ta consisti di dos (2) adulto y dos (2) mucha (edad 0-15 aña).

Na Mei 2023 e bestaansminimum mensual pa un hogar cu ta consisti di dos (2) adulto y dos (2) mucha (edad 0-15 aña) (Afl. 5,354) ta mustra un subida di Afl. 308 compara cu Mei 2022 (Afl. 5,046) y a wordo causa principalmente door di subidanan di respectivamente, Afl. 168 y Afl. 147 den e sectornan di “Cuminda y bebida no-alcoholico” y “Vivienda”.

Na Mei 2023 e bestaansminimum mensual pa un hogar cu ta consisti di un solo adulto ta Afl. 2.550, cual ta representa un deficit di entrada di Afl 657, un subida di Afl. 69 compara cu e deficit observa un aña pasa (Afl. 588). E deficit aki ta e di mas halto registra den un periodo di seis (6) aña pa luna di Mei.